போயஸ் கார்டனில் வீடு கட்டும் சசிகலா

03-08-2020 06:19 PM

சென்னை,

சென்னை போயஸ் கார்டனில் அமைந்துள்ள முன்னாள் முதல்வர் ஜெயலலிதாவின்  ‘வேதா இல்லம்’ எதிரே உள்ள நிலத்தில் அவரது தோழி சசிகலா வீடு கட்டி வருகிறார்.

முன்னாள் முதலமைச்சர் ஜெயலலிதாவின் தோழி சசிகலா, சொத்துக்குவிப்பு வழக்கில் பெங்களூரு சிறையில் அடைக்கப்பட்டுள்ளார். எந்த நேரமும் அவர் விடுதலை ஆகலாம் என எதிர்பார்க்கப்படுகிறது.

சென்னை போயஸ் கார்டனில் உள்ள ஜெயலலிதாவின் வேதா இல்லத்தில் தான் சசிகலா இத்தனை ஆண்டுகளாக வசித்து வந்தார்.

வேதா இல்லத்தைத் தமிழக அரசு நினைவு இல்லம் ஆக்கும் முயற்சியில் ஈடுபட்டுள்ளதால், போயஸ் கார்டனில் சசிகலா, தனக்கென தனி வீடு கட்டி வருகிறார்.

வேதா இல்லம் எதிரே அமைந்துள்ள நிலத்தில் சசிகலா கட்டும் இந்த வீடு, ஜெயலலிதா வீட்டை விட அளவில் பெரிதாகக் கட்டப்பட்டு வருகிறது.

முன்னாள் முதல்வர் ஜெயலலிதா உயிருடன் இருந்த போது இந்த நிலம் பாதுகாப்பு அதிகாரிகளின் வாகனங்களை நிறுத்துவதற்கான பார்க்கிங் இடமாகவும் பத்திரிகையாளர்கள் காத்திருக்கும் இடமாகவும் இருந்தது.

வேதா இல்லம் போல், சசிகலாவின் வீடும் தரைதளத்துடன் இரண்டு மாடிகளைக் கொண்டது. ஆனால் ஜெயலலிதா வீட்டை விட இங்கு தங்கும் அறைகள் விசாலமாக இருக்கும் என சசிகலாவின் குடும்ப உறுப்பினர் ஒருவர் தெரிவித்துள்ளார்.

சசிகலா வீடு கட்டும் இடம் ஸ்ரீஹரிசந்திரன் பிரைவேட் லிமிடெட் என்ற  நிறுவனத்தின் பெயரில் பதிவு செய்யப்பட்டுள்ளது.

இங்கு வீடு கட்ட சி.எம்.டி.ஏ. கடந்த ஆண்டே ஒப்புதல் அளித்துள்ளது.

கொரோனா பாதிப்பு காரணமாகக் கட்டுமான பணிகளில் தாமதம் ஏற்பட்டுள்ள போதிலும், சசிகலா ஜெயிலில் இருந்து வெளியே வரும் போது, அவரது சொந்த இல்லம் தயாராகி விடும் என்று கூறப்படுகிறது.

.



Trending Now: