கோவில்பட்டியில் கரோனா வைரஸ் பாதுகாப்பு நடவடிக்கை குறித்து அமைச்சர் கடம்பூர் ராஜு நேரில் ஆய்வு

25-03-2020 05:43 PM

தூத்துக்குடி

கோவில்பட்டியில் பழைய நகராட்சி அலுவலக வளாகத்தில் மகளிர் திட்டத்தின் மூலம் கரோனா வைரஸ் தொற்று மேலும் பரவாமல் தடுப்பு முன்னெச்சரிக்கை நடவடிக்கையாக நடைபெற்ற பணிகளை செய்தி மற்றும் விளம்பரத்துறை அமைச்சர்  கடம்பூர் செ.ராஜூ நேரில் பார்வையிட்டார்.

தூத்துக்குடி மாவட்டம் கோவில்பட்டி பழைய நகராட்சி அலுவலக வளாகத்தில் மகளிர் திட்டத்தின் மூலம் கொரானோ வைரஸ் முன்னெச்சரிக்கை நடவடிக்கைக்காக முகமூடி (மாஸ்க்), சோப்பு ஆயில், கிளினர் (லைசால்), கை கழுவும் திரவம் ஆகிய பொருட்கள் விற்பனை அங்காடி திறப்பு நிகழ்ச்சி இன்று (25.03.2020) நடைபெற்றது. நிகழ்ச்சியில்   செய்தி மற்றும் விளம்பரத்துறை அமைச்சர்  கடம்பூர் செ.ராஜூ அவர்கள் கலந்துகொண்டு அங்காடியை திறந்து வைத்தார். மேலும், கோவில்பட்டி நகராட்சி பேருந்து நிலைய பகுதியில் நடைபெறும் கிருமி நாசினி தெளிக்கும் பணிகளை பார்வையிட்டு ஆய்வு செய்தார்.

நிகழ்ச்சியில்  மாவட்ட ஆட்சித்தலைவர் திரு.சந்தீப் நந்தூரி,   விளாத்திகுளம் சட்டமன்ற உறுப்பினர்  சின்னப்பன் ஆகியோர் முன்னிலை வகித்தார்கள்.  

பின்னர்; செய்தி மற்றும் விளம்பரத்துறை அமைச்சர் அவர்கள் செய்தியாளர்களிடம் தெரிவித்ததாவது:

உலக நாடுகளை அச்சுறுத்துகின்ற கொரானோ வைரஸ் உலகில் உள்ள 195 நாடுகளில் 9 நாடுகளை தவிர 186 நாடுகளில் கொரானோ வைரஸ் அசுர வேகத்தில் பரவி வருகிறது. கொரனோ வைரஸ் பரவுவதை தடுக்கும் நடவடிக்கைகளில் அனைத்து நாடுகளும் மேற்கொண்டு வருகிறது.  பாதிக்கப்பட்டவர்களை தனிமைப்படுத்தி மற்றவர்களுக்கு பரவாமல் தடுப்பதோடு அவர்களையும் காப்பாற்றும் பணிகள் செய்யப்படுகிறது.  இந்தியாவில் கொரானோ பரவாமல் தடுக்க வெளிநாடுகளில் வரும் விமானங்கள், கப்பல்கள் மற்றும் ரயில் போக்குவரத்து உள்ளிட்ட அனைத்து போக்குவரத்துகளும் நிறுத்தப்பட்டுள்ளன. கொரானோ வைரஸ் பரவாமல் தடுப்பதற்கு ஒரே தீர்வு மருத்துவத்தை விட மக்கள் அதிகமாக கூடாமல் சமூக விலகலோடு இருக்க வேண்டும் என்பதுதான். இன்று பாராளுமன்றமும் ஒத்திவைக்கப்பட்டுள்ளது. சட்டமன்றமும் ஒத்தி வைக்கப்பட்டுள்ளது. மேலும் அனைத்து தொழிற்சாலைகளும், அலுவலகங்களும் இயங்காமல் மக்களின் அத்யாவசிய தேவைகளுக்கு மட்டும் குறைந்த அளவில் பணிபுரிய வேண்டும் என்று மாண்புமிகு பாரத பிரதமர் அவர்களும், தமிழகத்தில் மாண்புமிகு முதலமைச்சர் அவர்களும் வலியுறுத்தியுள்ளார்கள். 

பாரத பிரதமர் அவர்களின் கோரிக்கையை ஏற்று மக்கள் கடந்த ஞாயிற்றுக்கிழமை ஊரடங்கு உத்தரவை நல்ல முறையில் கடைபிடித்தார்கள்.  மருத்துவ பணியாளர்கள், செவிலியர்கள் மற்றும் துப்புரவு பணியாளர்களை பாராட்ட வேண்டும். அவர்கள்தான் இன்று அர்ப்பணிப்பு உணர்வோடு கடவுளாக பணியாற்றி வருகிறார்கள். இன்று நாடே முடங்கியுள்ள நிலையில் துப்புரவு பணியாளர்கள் நாட்டினை காக்க வேண்டும் என்றும், நாட்டு மக்களை காக்க வேண்டும் என்றும் அர்ப்பணிப்பு உணர்வோடு கடவுளாக பணியாற்றி வருகிறார்கள்.

தமிழக முதலமைச்சர் அவர்கள் சட்டமன்றத்தில், பொதுமக்களின் பொருளாதார இழப்பீட்டினை தீர்ப்பதற்காக ஒவ்வொரு குடும்ப அட்டைதாரருக்கும் ரூ.1,000ஃ- ரொக்கமும், வருகின்ற மாதத்திற்கு அரிசி, பருப்பு உள்ளிட்ட ரேசன் பொருட்களை விலையில்லாமல் வழங்கப்படும் என்றும் அறிவித்துள்ளார்கள்.

இயற்கை பேரிடர் நிதியில் இருந்து ரூ.500  கோடி வரை ஒதுக்கியுள்ளார்கள். மேலும் எவ்வளவு தேவைப்பட்டாலும் ஒதுக்குவேன், மக்கள் பாதிக்கப்படக்கூடாது அடித்தட்டு மக்கள், அமைப்புசாரா தொழிலாளர்கள் எவ்விதத்திலும் பாதிக்கப்படக்கூடாது என்பதுடன் அவர்கள் வாழ்வாதாரம் பாதிக்கப்படக்கூடாது என்பதற்கும் தீர்வு காணவும் மாண்புமிகு தமிழக முதலமைச்சர் அவர்கள் தீவிர நடவடிக்கை எடுத்து வருவதால்தான் தமிழகத்தில் கொரானோ வைரஸ் தாக்கம் குறைவாக உள்ளது.

நமது மாவட்டத்தில் 41 வருவாய் கோட்டங்கள் இருக்கின்றன. அந்த கோட்டங்கள் மூலமாக முழுமையாக கணக்கெடுக்ப்பட்டு சுமார் 600 குடும்பங்கள் தனிமைப்படுத்தப்பட்டிருக்கின்றன. வருவாய் துறை ஊழியர்கள், மருத்துவ துறை ஊழியர்கள், காவல் துறையினர் மற்றும் உள்ளாட்சி துறையினர் ஆகிய நான்கு துறையை சேர்ந்தவர்கள் வீடு வீடாக சென்று கணக்கெடுத்து இந்த 600 குடும்பங்கள் கண்டறியப்பட்டிருக்கின்றன.  அவர்கள் வெளியே தொடர்பு வைத்துக்கொள்ளக்கூடாது என்று கட்டுப்படுத்தப்பட்டிருக்கிறார்கள். எனவே தமிழகத்தில் கொரானோ வைரஸ் தாக்கம் குறைவாக உள்ளது. நமது மாவட்டத்தில் கட்டுப்படுத்தப்பட்டிருக்கிறது. கோவில்பட்டி அரசு மருத்துவமனையில் இதுவரை ஒரு நோயாளி கூட கொரானோ வைரஸ் பாதிப்பில் வராவிட்டாலும் தனியாக வார்டு அமைக்கப்பட்டு அங்கு மருத்துவர்களும், செவிலியர்களும் தயார் நிலையில் உள்ளனர். மருத்துவமனை முழுவதும் கிருமி நாசினி தெளிக்கப்பட்டு முழு கட்டுப்பாட்டில் உள்ளது.

தூத்துக்குடியில் மகளிர் திட்டத்தின் மூலம் மகளிர் சுய உதவிக்குழுக்கள் வாயிலாக முகமூடி (மாஸ்க்), சோப்பு ஆயில், கிளினர் (லைசால்), கை கழுவும் திரவம் ஆகிய பொருட்கள் தயாரிக்கப்பட்டு விற்பனை அங்காடி இன்று காலை திறந்து வைக்கப்பட்டுள்ளது. தற்போது கோவில்பட்டி நகராட்சி பழைய அலுவலக வளாகத்தில் முகமூடி (மாஸ்க்), சோப்பு ஆயில், கிளினர் (லைசால்), கை கழுவும் திரவம் விற்பனை அங்காடி திறக்கப்பட்டு மக்களுக்கு குறைந்த விலையில் வழங்கப்படுகிறது. தூத்துக்குடி மாவட்டத்தில் தூத்துக்குடி, கோவில்பட்டி, சாத்தான்குளம், விளாத்திகுளம், ஓட்டப்பிடாரம், ஆழ்வார்திருநகரி, புதூர், திருவைகுண்டம், கயத்தாறு, செய்துங்கநல்லூர், உடன்குடி உள்ளிட்ட 14 இடங்களில் மகளிர் திட்டத்தின் மூலம் கொரானோ வைரஸ் தடுப்புக்கு தேவைப்படும் பொருட்கள் தட்டுப்பாடின்றி கிடைக்க விற்பனை செய்யப்படும். அரசு எத்தகைய நடவடிக்கை எடுத்தாலும் மக்கள் சுய கட்டுப்பாட்டுடன் இருந்தால்தான் கொரானோ வைரஸ் பரவலை கட்டுப்படுத்த முடியும்,

பாரத பிரதமர் அவர்கள் 21 நாட்கள் ஊரடங்கு உத்தரவை அறிவித்துள்ளார்கள். மக்கள் ஊரடங்கை கடைபிடிக்க வேண்டும் என்று கைகூப்பி வேண்டி கேட்டுக்கொண்டுள்ளார்கள். எனவே அரசின் உதவியோடு மக்களின் பங்களிப்போடு இந்தியாவிலும், தமிழகத்திலும் கரானோ வைரஸ் பரவலை கட்டுப்படுத்த வேண்டும் என அமைச்சர் தெரிவித்தார்.

முன்னதாக கோவில்பட்டி அரசு மருத்துவமனையில் கொரானோ வைரஸ் தடுப்பு நடவடிக்கைக்காக அமைக்கப்பட்டுள்ள சிறப்பு வார்டு பகுதியை செய்தி மற்றும் விளம்பரத்துறை அமைச்சர் அவர்கள் பார்வையிட்டார். மேலும், மருத்துவர்கள் மற்றும் செவிலியர்களை பாராட்டினார். 

மாவட்ட ஆட்சித்தலைவர் அவர்களிடம் தூத்துக்குடி மாவட்டத்தில் கொரானோ வைரஸ் தடுப்பு தொடர்பாக மேற்கொள்ளப்பட்டுள்ள பல்வேறு நடவடிக்கைகள் குறித்து அமைச்சர் கடம்பூர் ராஜூ கேட்டறிந்தார்.

நிகழ்ச்சியில் கோவில்பட்டி வருவாய் கோட்டாட்சியர் திருமதி.விஜயா, துணை இயக்குநர் சுகாதார பணிகள் (பொறுப்பு) மரு.அனிதா, மகளிர் திட்டம் திட்ட அலுவலர் திருமதி.ரேவதி, கோவில்பட்டி நகராட்சி ஆணையர் ராஜாராம், காவல் துணை கண்காணிப்பாளர் ஜெபராஜ், முக்கிய பிரமுகர்கள்  அய்யாத்துரைபாண்டியன்,  விஜயபாண்டியன் மற்றும் அலுவலர்கள் கலந்துகொண்டனர்.



Trending Now: