நியூஸிலாந்துக்கு எதிரான 5 டி20 கிரிக்கெட் போட்டியிலும் இந்திய அணி அபார வெற்றி

02-02-2020 04:10 PM

நியூஸிலாந்து

நியூஸிலாந்து அணிக்கு எதிரான கடைசி டி20 கிரிக்கெட் போட்டியிலும் வெற்றி பெற்ற இந்திய அணி 5 ஆட்டங்கள் கொண்ட டி20 தொடரை 5-0 என முழுமையாகக் கைப்பற்றியுள்ளது.

நியூஸிலாந்து, இந்தியா அணிகளுக்கிடையிலான 5-வது மற்றும் கடைசி டி20 ஆட்டம் இன்று (ஞாயிற்றுக்கிழமை) நடைபெற்றது. டாஸ் வென்று முதலில் பேட் செய்த இந்திய அணி நிர்ணயிக்கப்பட்ட 20 ஓவர்கள் முடிவில் 3 விக்கெட்டுகளை இழந்து 163 ரன்கள் எடுத்தது.

164 ரன்கள் என்ற வெற்றி இலக்குடன் நியூஸிலாந்து அணி களமிறங்கியது.

நியூஸி அணிக்கு தொடக்கம் படுமோசமாக அமைந்தது. முதல் விக்கெட்டாக கப்தில் 2 ரன்களுக்கு பூம்ரா வீச்சில் ஆட்டமிழந்தார்.

அதிரடி காட்டிய கோலின் முன்ரோ 6 பந்துகளில் 15 ரன்கள் எடுத்த நிலையில் வாஷிங்டன் சுந்தர் ஓவரில் போல்டானார்.

அடுத்து களமிறங்கிய டாம் புரூஸும் ரன் ஏதும் எடுக்காமல் ரன் அவுட் முறையில் ஆட்டமிழந்தார். இதனால், நியூஸி அணி 17 ரன்களுக்குள் 3 விக்கெட்டுகளை இழந்து திணறியது.

சைஃப்ர்ட்டுடன் ராஸ் டெய்லர் இணைந்தார். இந்த இணை தொடக்கத்தில் விக்கெட்டைப் பாதுகாத்து விளையாடியது. இதன்பிறகு, ரன் ரேட்டை உயர்த்தும் நோக்கில் இருவரும் அதிரடிக்கு மாற முயற்சித்தனர்.

10-வது ஓவரை வீசிய துபே 34 ரன்களை வாரி வழங்கினார். இதனால், இந்த ஓவரின் முடிவில் நியூஸிலாந்து அணி 10 ஓவர்களில் 3 விக்கெட்டுகளை இழந்து 98 ரன்களை எட்டியது.

 வெற்றிக்குத் தேவையான ரன் ரேட்டை எளிதாக்கியது. வெற்றி பெற ஒரு ஓவருக்கு 7-க்கும் குறைவான ரன்களே தேவை என்ற நிலை ஏற்பட்டது.

சைஃபர்ட் அரைசதம் அடித்த கையோடு சரியாக 50 ரன்களுக்கு சைனி பந்தில் ஆட்டமிழந்தார். இந்த விக்கெட் இந்திய அணியின் வெற்றிக்கான கதவைத் திறந்தது.

அடுத்த ஓவரில் பூம்ரா யார்க்கரில் மிட்செல் 2 ரன்களுக்கு போல்டானார்.

அடுத்தடுத்து விக்கெட்டுகள் சரிந்ததால் வெற்றிக்குத் தேவையான ரன் ரேட்டும் மீண்டும் உயரத் தொடங்கியது.

ஷர்துல் தாக்கூர் மீண்டும் வீசிய ஓவரில் 3-வது பந்தில் சான்டனரையும், 5-வது பந்தில் குக்லெயினையும் ஆட்டமிழக்கச் செய்தார் ஷர்துல் தாக்கூர்.

விருவிருப்பான கடை ஓவர்கள்

இந்த நெருக்கடியிலேயே அடுத்த ஓவரின் (18-வது ஓவர்) முதல் பந்தில் ராஸ் டெய்லரும் அரைசதம் அடித்த கையோடு 53 ரன்களுக்கு ஆட்டமிழந்தார்.

கடைசி 2 ஓவரில் நியூஸிலாந்து அணியின் வெற்றிக்கு 24 ரன்கள் தேவைப்பட்டது.

19-வது ஓவரை வீசிய பூம்ரா வெறும் 3 ரன்களை மட்டுமே விட்டுக்கொடுத்து, நியூஸிலாந்து அணியின் கடைசி நம்பிக்கையாக இருந்த சௌதி விக்கெட்டையும் கைப்பற்றினார்.

நியூஸிலாந்து அணியின் வெற்றிக்கு கடைசி ஓவரில் 21 ரன்கள் தேவைப்பட்டது. ஒரு விக்கெட் மட்டுமே மீதமிருந்தது.

இந்த ஓவரை ஷர்துல் தாக்கூர் வீசினார். இதில், சோதி 2 இமாலய சிக்ஸர்கள் அடித்தாலும், 13 ரன்கள் மட்டுமே நியூஸிலாந்து அணிக்கு கிடைத்தது.

ஓயிட்வாஷ் செய்த இந்திய அணி

5-வது மற்றும் கடைசி டி20 ஆட்டத்தில் இந்திய அணி 7 ரன்கள் வித்தியாசத்தில் வெற்றி பெற்று 5-0 என்ற கணக்கில் தொடரைக் கைப்பற்றியது.

இந்திய அணித் தரப்பில் பூம்ரா 3 விக்கெட்டுகளையும், நவ்தீப் சைனி மற்றும் ஷர்துல் தாக்கூர் தலா 2 விக்கெட்டுகளையும் வீழ்த்தினர். வாஷிங்டன் சுந்தர் 1 விக்கெட்டைக் கைப்பற்றினார்.

ஆட்டநாயகன் விருதை பூம்ராவும், தொடர் நாயகன் விருதை ராகுலும் கைப்பற்றினர்.

நியூஸிலாந்து மண்ணில் நியூஸிலாந்து அணியை இந்திய அணி வெற்றி கொண்டது இதுவே முதல் தரம்.



Trending Now: