சபரிமலை விவகாரம்: சீராய்வு வழக்கு 7 நீதிபதிகள் அமர்வுக்கு மாற்றியது உச்சநீதிமன்றம்

14-11-2019 11:11 AM

புதுடில்லி,        

சபரிமலை ஐயப்பன் கோவிலுக்கள் செல்ல அனைத்து வயதுடைய பெண்களுக்கும் அனுமதி அளித்ததை எதிர்த்து தொடரப்பட்ட சீராய்வு வழக்குகள், 7 நீதிபதிகள் கொண்ட அமர்வுக்கு மாற்றப்படும் என்று உச்சநீதிமன்றம் இன்று தெரிவித்துள்ளது.

சபரிமலை ஐயப்பன் கோவிலுக்குள், அனைத்து வயது பெண்களும், பாலின வேறுபாடுகளின்றி செல்ல அனுமதிக்கப்படவேண்டும் என்று, கடந்த 2018 செப்டம்பரில் உச்சநீதிமன்றம் அதிரடி தீர்ப்பளித்தது. உடல் ரீதியான வித்தியாசங்களின் அடிப்படையில் பெண்கள் மீது விதிக்கப்படும் தடை, அரசியல் சட்டத்திற்கு முரணானது. இந்த தடை அரசியல் சட்டத்தில், அனைவருக்கும் சம உரிமைகளை அளிக்கும் சட்டப்பிரிவு 14 மற்றும் மத உரிமையை அளிக்கும் சட்டப்பிரிவு 25 ஆகியவற்றிற்கு முரண்பாடானது என்று கருத்து தெரிவித்தது.

அப்போதைய தலைமை நீதிபதி தீபக் மிஸ்ரா தலைமையிலான, உச்சநீதிமன்றத்தின் 5 நீதிபதிகள் கொண்ட அரசியல் சாசன அமர்வு, 4:1 என்ற பெரும்பான்மையில் அந்த தீர்ப்பை வழங்கியது. அந்த தீர்ப்பின் விளைவாக, போராட்டங்கள் வெடித்தன. பெண் செயல்பாட்டாளர்கள் பலர், சபரிமலை கோவிலுக்குள் செல்ல முயன்றனர். தீர்ப்பை எதிர்த்து உச்சநீதிமன்றத்தில் சீராய்வு மனுக்கள் தாக்கல் செய்யப்பட்டன.

இந்த மனுவை விசாரித்த தலைமை நீதிபதி ரஞ்சன் கோகாய் தலைமையிலான அரசியல் சாசன அமர்வு, இன்று காலை தீர்ப்பு வழங்கியது. 3:2 என்ற பெரும்பான்மையில் இந்த தீர்ப்பு வழங்கியது.

7 நீதிபதிகள் அமர்வுக்கு மாற்றம்

தலைமை நீதிபதி ரஞ்சன் கோகாய் தீர்ப்பை வாசித்தார். அதில், ”பெண்கள் செல்ல கட்டுப்பாடு விதிக்கப்படுவது சபரிமலையில் மட்டுமல்ல வேறு கோவில்களிலும், மசூதிகளிலும் உள்ளது. அனைத்து மதத்தினரும் அவரவர் மத நம்பிக்கையை கடைப்பிடிக்க உரிமை உள்ளது.

மத வழிபாடு, நம்பிக்கை என்ற பெயரில் பாகுபாடுகூடாது. மதம் சம்பந்தப்பட்ட விஷயங்களில் ஆய்வு செய்ய வேண்டியுள்ளது. எனவே, இந்த வழக்கை 7 நீதிபதிகள் கொண்ட வேறு அமர்வுக்கு பரிந்துரை செய்கிறோம்” என்று தலைமை நீதிபதி ரஞ்சன் கோகாய் தெரிவித்தார்.

எனினும், அனைத்து வயதுடைய பெண்களும் சபரிமலைக்கு செல்ல அனுமதி அளித்து, உச்ச நீதிமன்றம் ஏற்கனவே வழங்கிய தீர்ப்புக்கு தடை விதிக்கப்படவில்லை என்பது குறிப்பிடத்தக்கது.