சென்னை -பாண்டிபஜாரில் ஸ்மார்ட் சிட்டி திட்டத்தின் நடைபாதை, ஸ்மார்ட் சாலைகள்: முதலமைச்சர் பழனிசாமி திறந்தார்

13-11-2019 06:06 PM

சென்னை:

சென்னை - தியாகராயர் நகர் - பாண்டி பஜாரில் ஸ்மார்ட் சிட்டி திட்டத்தின் கீழ், ரூ.39 கோடி செலவில் அழகுபடுத்தப்பட்ட நடைபாதை வளாகம் மற்றும் ஸ்மார்ட் சாலைகளை இன்று மாலை முதலமைச்சர் எடப்பாடி கே. பழனிசாமி திறந்து வைத்தார்.

ஸ்மார்ட் சிட்டி திட்டத்தின் கீழ்  பாண்டிபஜாரில் பொதுமக்கள் வசதிக்காக  39.36 கோடி செலவில்  சென்னை தியாகராய நகர் பனகல் பூங்கா முதல் பாண்டிபஜார் சந்திப்பு வரை அமைக்கப்பட்டுள்ளது நடைபாதை வளாகம்.

இந்த நடைபாதையின் இருபுறங்களிலும் எல்இடி பல்புகள் பொருத்தப்பட்ட அலங்கார விளக்குகள் அமைக்கப்பட்டுள்ளன.

சாலையில் உள்ள அனைத்து சுவர்களிலும்  அழகுப்படுத்தும் வகைகளில் பல்வேறு வண்ண ஓவியங்கள் தீட்டப்பட்டுள்ளன.

நடைபாதையில் பொதுமக்கள் அமரும் வகையில் இருக்கைகள் (ஸ்ட்ரீட் பர்னிச்சர்) அமைக்கப்பட்டது.

சாலையில் உள்ள மரங்களை சுற்றி பொதுமக்கள் அமரும் வகையில் இருக்கைகள் அமைக்கப்பட்டுள்ளன.  

சாலையில் செல்வோர் பயன்படுத்துவதற்காக 22 இடங்களில் இலவச வைஃபை வசதியும் ஏற்படுத்தப்பட்டுள்ளது. மேலும் போக்குவரத்து மற்றும் நடைபாதைகளை கண்காணிக்க நவீன கேமராக்கள் பொருத்தப்பட்டுள்ளன.

இந்த வளாகத்தை  சுற்றியுள்ள 14 சாலைகள் ரூ.19.11 கோடி செலவில் தரமான ஸ்மார்ட் சாலைகளாக மாற்றப்பட்டுள்ளன.

ரூ.39.86 கோடி செலவில் அழகுபடுத்தப்பட்ட நடைபாதை வளாகம் மற்றும் ஸ்மார்ட் சாலைகளை  கோவில் மணியை அடித்து முதலமைச்சர் எடப்பாடி கே. பழனிசாமி திறந்து வைத்தார்.

அமைச்சர்களுடன் முதலமைச்சர் பழனிசாமி நடைபாதையில் நடந்து பார்வையிட்டார். பின்னர் பேட்டரி காரில் சென்றும் பார்வையிட்டார்.

இந்நிகழ்வில் பேசிய முதலமைச்சர்

ஸ்மார்ட் சிட்டி திட்டத்தின் கீழ் உலகத் தரத்திற்கேற்ப சாலை அமைக்கப்பட்டுள்ளது; இதன்மூலம் மக்கள் எளிதாக பாண்டி பஜார் பகுதியில் பயணம் செய்ய முடியும்.

போதிய நிதி ஆதாரத்தை திரட்டி அனைத்து சாலைகளும் படிப்படியாக சீரமைக்கப்படும்.

தமிழகம் முழுவதும் ஸ்மார்ட் சிட்டி பணிகள் விறுவிறுப்பாக நடைபெற்று வருகிறது.

ஸ்மார்ட் சிட்டி பணிகளில் தமிழகம் 8வது இடத்தில் உள்ளது. தற்போது  உலகத்தரம் வாய்ந்த சாலைகளும், நடைபாதைகளும் ஸ்மார்ட் ஸிட்டி திட்டத்தின் கீழ் திறக்கப்பட்டுள்ளன என முதலமைச்சர் பழனிசாமி பேசினார்.

முன்னதாக, போக்குவரத்து சிக்னலாகப் பயன்படும் லேசர் லைட் பொருத்தப்பட்ட சிலம்பக் காட்சியை அரங்கேற்றினர், அதை பார்த்து முதலமைச்சர் ரசித்தார்.

இந்த நிகழ்ச்சியில் நகராட்சி நிர்வாகம் மற்றும் குடிநீர் வழங்கல் துறை அமைச்சர்  எஸ்.பி. வேலுமணி, அமைச்சர் ஜெயக்குமார், தலைமை செயலாளர் க. சண்முகம், நகராட்சி நிர்வாகத்துறை முதன்மை செயலாளர் ஹர்மந்தர் சிங், சென்னை மாநகராட்சி ஆணையர் பிரகாஷ், நகராட்சி நிர்வாக துறை உயர்  அதிகாரிகள், சென்னை மாநகராட்சி இணை ஆணையர், துணை ஆணையர், ஸ்மார் சிட்டி அதிகாரிகள் ஆகியோர் பங்கேற்றனர்.