தமிழில் ரீ – எண்ட்ரியாகும் குட்டி ராதிகா!

05-11-2019 04:50 PM

‘இயற்கை’ படத்தின் மூலம் தமிழ்த் திரையுலகில் அறிமுகமாகி பரவலாக கவனம் பெற்ற குட்டி ராதிகா 13 ஆண்டுகால இடைவெளிக்குப்பின் ‘தமயந்தி’ என்ற படத்தின் மூலம் தமிழுக்கு மீண்டும் திரும்புகிறார். இதே படத்தில் ரஜினியின் உயிர் நண்பர் ராஜ் பகதுார், குட்டி ராதிகாவின் தந்தையாக நடிக்கிறார்.

எஸ்.பி. ஜனநாதன் இயக்குநராக அறிமுகமான ‘இயற்கை’ படத்தில் ஷாம், அருண் விஜய், குட்டி ராதிகா ஆகியோர் இணைந்து நடித்திருந்தனர்.  இப்படத்தில் குட்டி ராதிகாவுக்கு தமிழில் ஒரு நல்ல அறிமுகம் கிடைத்தது.  2006ம் ஆண்டோடு தமிழ் சினிமாவை விட்டு விலகினார் குட்டி ராதிகா.

இந்நிலையில் 13 ஆண்டு காலத்திற்கு பிறகு, தற்போது நவரசன் இயக்கத்தில் ‘தமயந்தி’ என்ற ஹாரர் த்ரில்லர் படத்தில் நடித்துள்ளார். இப்படம் தமிழ், தெலுங்கு, கன்னடம் ஆகிய மூன்று மொழிகளில் தயாராகிறது. மேலும் இந்தி, மலையாளம் ஆகிய மொழிகளில் எடுக்கப்பட்டு வருகிறது. படத்தில் குட்டி ராதிகாவை கமிட் செய்தது குறித்து சொன்ன இயக்குநர் நவரசன்,

“‘அருந்ததி,’ ‘பாகமதி’ ஆகிய படங்கள் போன்ற ஹாரர் த்ரில்லர் படம் ‘தமயந்தி.’ இதில் நடிக்க முதலில் அனுஷ்காவை தொடர்பு கொண்டேன். அவருக்கு திரைக்கதை மிகவும் பிடித்திருந்தாலும் மற்ற படங்களில் ஒப்பந்தமாகியிருந்ததால் அவரால் நடிக்க முடியவில்லை. எனது இரண்டாவது தேர்வு குட்டி ராதிகா. அவரும் இரண்டு கன்னடப் படங்களில் பிசியாக இருந்தார். இருப்பினும் ஒரு முறை கதையைக் கேளுங்கள் என்று கூறி அவரிடம் விவரித்தேன். கேட்டபின் தான் நடிப்பதாக உடனே சம்மதித்தார். இதற்காக மற்ற படங்களின் தேதிகளை மாற்றியமைத்தார். இரண்டு காலகட்டங்களின் பின்னணியில் கதை நடைபெறுகிறது. அதில் ராதிகா இளவரசியாக நடிக்கிறார். ரஜினிகாந்தின் நண்பர் ராஜ் பகதூர் அவருக்கு அப்பாவாக நடிக்கிறார்’’ என்றார்.

இப்படத்தின் படப்பிடிப்பு ஐதராபாத், பெங்களூரு, மைசூர், மற்றும் கேரளாவின் சில இடங்களில் நடைபெற்றுள்ளது.  தற்போது படத்தின் பின்ணனி வேலைகள் நடந்து வருகின்றன. இம்மாதம் 2வது வாரத்தில் இசை வெளியீட்டு விழாவும், 29ம் தேதி ரிலீஸ் செய்யவும் திட்டமிட்டுள்ளார்கள்.