மத்திய அரசு ஊழியர்களுக்கு 5% அகவிலைப்படி உயர்வு: மத்திய அமைச்சர் பிரகாஷ் ஜாவடேகர் அறிவிப்பு

09-10-2019 04:17 PM

புதுடில்லி,

மத்திய அரசு ஊழியர்களுக்கும், ஓய்வூதியதாரர்களுக்கும் 5 சதவீதம் அகவிலைப்படி உயர்த்தப்பட்டுள்ளது. இதன்மூலம், 50 லட்சம் மத்திய அரசு ஊழியர்கள் மற்றும் 65 லட்சம் ஓய்வூதியதாரர்கள் பயன்பெறுவார்கள் என்று மத்திய தகவல் மற்றும் ஒலிபரப்புத் துறை அமைச்சர் பிரகாஷ் ஜாவ்டேகர் செய்தியாளர்களிடம் தெரிவித்தார்.

பிரதமர் நரேந்திர மோடி தலைமையில் டில்லியில் இன்று மத்திய அமைச்சரவைக் கூட்டம் நடைபெற்றது.

தீபாவளி பண்டிகையை முன்னிட்டு, மத்திய அரசு ஊழியர்களுக்கு 5% அகவிலைப்படியை உயர்த்த மத்திய அமைச்சரவை கூட்டத்தில் முடிவு எடுக்கப்பட்டது.

அமைச்சரவைக் கூட்டத்துக்குப் பின்னர் மத்திய அமைச்சர் பிரகாஷ் ஜாவடேகர் செய்தியாளர்களை சந்தித்து பேசுகையில் :

மத்திய அரசு ஊழியர்களுக்கு அதிகப்படியாக 5 சதவீதம் அகவிலைப்படி உயர்த்தப்படுவது இதுவே முதல் முறை. மத்திய அரசின் இந்த அறிவிப்பால் வரும் தீபாவளி பண்டிகை அரசு ஊழியர்களுக்கு மேலும் மகிழ்ச்சியை அளிக்கும்.

இந்த அறிவிப்பின் மூலம், மத்திய அரசுக்கு கூடுதலாக ரூ.16,000 கோடி செலவாகும் என மத்திய அமைச்சர் பிரகாஷ் ஜாவ்டேகர் கூறினார்.

இதற்கு முன்பு, மத்திய அரசு ஊழியர்களுக்கும், ஓய்வூதியதாரர்களுக்கும், கடந்த பிப்ரவரி மாதம் அகவிலைப்படி 3% உயர்த்தப்பட்டு, ஜனவரி 1ஆம் தேதி முதல் முன்தேதியிட்டு வழங்கப்பட்ட நிலையில், இன்று மீண்டும் அகவிலைப்படி உயர்த்தப்பட்டுள்ளது.