விக்ரம் லேண்டரை தற்போது தொடர்புகொள்ள இயலவில்லை: இஸ்ரோ தலைவர் சிவன் பேட்டி

21-09-2019 12:26 PM

சென்னை

நிலவை ஆராய்வதற்காக கடந்த செப்டம்பர் 7ம் தேதி சந்திரயான் 2  விண்ணில் செலுத்தப்பட்டது. நிலவின் தென்துருவப் பகுதியை ஆராய்வதற்காக அனுப்பிய விக்ரம் லேண்டர் சந்திரயானிலிருந்து பிரிந்து நிலவுக்கு அருகே 400 மீட்டர் தூரத்தில், தரையிறங்க முயற்சித்தபோது கட்டுப்பாட்டு அறையுடன் தொடர்பு துண்டிக்கப்பட்டது.

விக்ரம் லேண்டரிலிருந்து தொடர்பு சிக்னலை மீட்க இஸ்ரோ விஞ்ஞானிகள் மேற்கொண்ட முயற்சிகள் பலன் அளிக்கவில்லை.

நிலவில் விழுந்திருந்த விக்ரமை படம் எடுத்து அனுப்பிய நாசாவின் ஆர்பிட்டரும் தெளிவான படங்களை அனுப்பவில்லை. விக்ரம் லேண்டருடன் சமிக்ஞை தொடர்பும் கொள்ள் முடியவில்லை என நாசா கூறியது.

விக்ரம் லேண்டரின் ஆய்வு காலமான 14 நாட்கள் நேற்றுடன் முடிந்து விட்டது. இஸ்ரோ விஞ்ஞானிகள் விக்ரமின் தொடர்பு துண்டிக்கப்பட்டதன் காரணத்தைத் தொடர்ந்து ஆராய்ந்து வருகின்றனர்.

விக்ரம் லேண்டர் குறித்து  இஸ்ரோ தலைவர் சிவன் கூறியதாவது:-

விக்ரம் லேண்டருடன் எங்களால் தொடர்பு கொள்ள முடியவில்லை. விக்ரம் லேண்டரை தொடர்புகொள்ளும் முயற்சிகள் பலன் அளிக்கவில்லை.

சந்திரயான்-2 ஆர்பிட்டரின் செயல்பாடுகள் சிறப்பாக உள்ளது. ஆர்பிட்டரில் மொத்தம் 8 கருவிகள் உள்ளன, 8 கருவிகளும் மிகச் சிறப்பாக செயல்படுகின்றன.

மனிதனை விண்ணுக்கு அனுப்பும் ககன்யான் திட்டத்திற்கு முன்னுரிமை அளித்து வருகிறோம்.

"ககன்யான் திட்டம் தான் இஸ்ரோவின் அடுத்த இலக்கு!" - என  இஸ்ரோ தலைவர் சிவன் கூறினார்.

நிலவில் 14 நாட்கள் இரவாகவும், 14 நாட்கள் பகலாகவும் இருக்கும், பகலில் சூரிய ஒளித்தகடுகள் மூலம் விக்ரம் லேண்டர் செயல்படும். இரவில் -200 டிகிரி அளவிற்கு குளிர் நிலவும் என்பதால் விக்ரம் லேண்டரை தொடர்பு கொள்ள இயலாது, நிலவில் மீண்டும் பகல் பொழுது வரும்போது விக்ரம் லேண்டரை தரைக்கட்டுப்பாட்டு அலுவலகத்திலிருந்து மீண்டும் தொடர்பு கொள்ள முயற்சி நடைபெறும் என்று முன்பு சிவன் கூறியிருந்தார் என்பது குறிப்பிடத்தக்கது.