குளிர்பான பிளாஸ்டிக் பாட்டில்கள், சிகரெட் உள்ளிட்ட 12 பொருட்களுக்கு தடை விதிக்க மத்திய அரசு ஆலோசனை

14-09-2019 12:17 PM

புதுடில்லி

குளிர்பான விற்பனைக்கு  பயன்படுத்தப்படும் பிளாஸ்டிக் பாட்டில்கள், சிகரெட் பட்ஸ் உள்பட 12 வகையான பொருட்களுக்கு தடை விதிக்க மத்திய அரசு ஆலோசனை மேற்கொண்டு வருகிறது.

ஒரு முறை மட்டுமே உபயோகப்படும் பிளாஸ்டிக் பொருட்களுக்கு தடை விதிக்க மோடி தலைமையிலான மத்திய அரசு முடிவு செய்துள்ளது. சமீபத்தில் நிகழ்ச்சி ஒன்றில் பேசிய பிரதமர் மோடி,

”வரும் அக்டோபர் 2ம் தேதிமுதல் ஒருமுறை பயன்படுத்தும் பிளாஸ்டிக்கை ஒழிக்கும் நடவடிக்கையில் அனைவரும் ஈடுபடவேண்டும். மகாத்மா காந்தி பிறந்தநாளான அன்றுமுதல் ஒருமுறை பயன்படுத்தும் பிளாஸ்டிக்கை முழுமையாக நாம் தடை செய்வோம்.

வீடு, அலுவலகம், பணிபுரியும் இடம் என அனைத்துப் பகுதிகளிலும் ஒருமுறை பயன்படுத்தும் பிளாஸ்டிக்கிற்கு விடை கொடுப்போம். சுய உதவிக்குழு, சமூக அமைப்புகள், தனிநபர் என பல்வேறு தரப்பினரும் இந்த இயக்கத்தில் தங்களை இணைத்துக் கொள்ள வேண்டும். சுற்றுச்சூழலுக்கு மாசு ஏற்படுத்தும் ஒருமுறை பயன்படுத்தும் பிளாஸ்டிக்கிற்கு முழுமையாக விடை கொடுப்போம்” என்று கூறியிருந்தார்.

இந்நிலையில், ஒருமுறை மட்டுமே பயன்படும் 12 வகையான பிளாஸ்டிக் பொருட்களுக்கு தடைவிதிக்க மத்திய அரசு முடிவு செய்துள்ளது. குடிநீர் தவிர்த்து பிற பொருட்களுக்கு பயன்படுத்தப்படும் சிறிய பிளாஸ்டிக் பாட்டில்கள், அலங்கார பொருட்கள் மற்றும் சிகரெட் பட்ஸ்களில் பயன்படுத்தப்படும் தெர்மோகோல் உள்ளிட்ட பிளாஸ்டிக் பொருட்களுக்கு தடை விதிக்க மத்திய அரசு பரிசீலித்து வருவதாக தகவல்கள் கிடைத்துள்ளன.

ஒருமுறை பயன்படுத்தும் பிளாஸ்டிக் பொருட்களுக்கு முற்றிலும் தடை விதிக்க மத்திய அரசு ஆர்வம்காட்டி வருவதாகவும், எனினும் இதை அமல்படுத்துவதற்கான காலக்கெடு எதுவும் நிர்ணையிக்கப்படவில்லை என மத்திய அமைச்சர் ராம்விலாஸ் பாஸ்வான் தெரிவித்துள்ளார். பல்வேறு கட்டங்களாக தடை அமல்படுத்தப்படும் எனவும் அவர் தெரிவித்தார்.

தடை செய்யப்படவேண்டிய 12 வகையான பிளாஸ்டிக் பொருட்களை மத்திய அரசு தொகுத்துள்ளது. மத்திய மாசுக்கட்டுப்பாடு வாரியத்திடம் இவை சமர்ப்பிக்கப்படும். கனமான பிளாஸ்டிக் கேரி பேக்ஸ், ஸ்டிராஸ், பிளாஸ்டிக் கரண்டிகள், பவுல்கள், பிளாஸ்டிக் கொடிகள், சிகரெட் பட்ஸ்கள், பேனர்கள் உள்ளிட்டவை தடை செய்ய தீர்மானிக்கப்பட்ட பட்டியலில் இடம் பிடித்துள்ளன.

சுற்றுச்சூழலுக்கு கேடாக விளங்கும் பிளாஸ்டிக் பொருட்களை வரும் 2022ம் ஆண்டுக்குள் முற்றிலும் தடை செய்வதற்கான செயல்திட்டங்களை மத்திய மாசுக்கட்டுப்பாட்டு வாரியம் தயார்செய்து வருகின்றது என்பது குறிப்பிடத்தக்கது.