இருளில் இருந்து நாட்டை மீட்கும் திட்டம் எங்கே?: ப.சிதம்பரம் திகார் சிறையில் இருந்து கேள்வி

11-09-2019 02:55 PM

புதுடில்லி

  குறைந்த வருமானம், குறைவான வேலை வாய்ப்புகள் இந்த சரிவு மற்றும் இருளில் இருந்து நாட்டை மீட்கும் திட்டம் எங்கே? என முன்னாள் மத்திய அமைச்சர் ப.சிதம்பரம் திகார் சிறையில் இருந்து டுவிட்டர் மூலம் கேள்வி எழுப்பியுள்ளார்.

ஐஎன்எக்ஸ் மீடியா முறைகேடு வழக்கில் சிபிஐயால் கைது செய்யப்பட்ட முன்னாள் மத்திய நிதி அமைச்சர் ப.சிதம்பரம், விசாரணைக்குப் பிறகு நீதிமன்றக் காவலில் திகார் சிறையில் அடைக்கப்பட்டுள்ளார். இந்நிலையில் குடும்பத்தினர் உதவியுடன், ப.சிதம்பரம் தனது சார்பாக சமூக வலைதளத்தில் கருத்தை பதிவிட்டு உள்ளார்.

ப.சிதம்பரத்தின் டுவிட்டர் பக்கத்தில்,”எனது சார்பாக ட்வீட் செய்ய எனது குடும்பத்தினரை நான் கேட்டுக்கொண்டேன். அனைவரும் அளிக்கும் ஆதரவுக்கு என் நன்றிகள். நீதி மற்றும் அநீதியை வேறுபடுத்திப் பார்க்கும் ஏழைகளின் திறனைக் கண்டு நான் வியப்படைகிறேன் (கடந்த சில நாட்களாக சந்திக்கவும் உரையாடவும் எனக்கு வாய்ப்பு கிடைத்தது)” என்று குறிப்பிட்டுள்ளார்.

மேலும்,”நான் பொருளாதாரம் குறித்து ஆழ்ந்த அக்கறை கொண்டுள்ளேன். ஏழைகள்தான் அதிகம் பாதிக்கப்படுகின்றனர். குறைந்த வருமானம், குறைவான வேலை வாய்ப்புகள், குறைந்த வர்த்தகம் மற்றும் குறைந்த முதலீடு ஆகியவை ஏழைகளையும் நடுத்தர மக்களையும் பாதிக்கின்றன. இந்த சரிவு மற்றும் இருளில் இருந்து நாட்டை காப்பாற்றும் திட்டம் எங்கே?” என ப.சிதம்பரம் கேள்வி எழுப்பியுள்ளார்.