சத்தீஸ்கரை முன்மாதிரியாக எடுத்துக்கொள்ளுங்கள்: நிர்மலா சீதாராமனுக்கு முதல்வர் பூபேஷ் பாகல் அறிவுரை

11-09-2019 11:17 AM

ராய்ப்பூர்,              

நாட்டின் பொருளாதாரத்தை சரிசெய்ய சத்தீஸ்கார் மாநிலத்தின் பொருளாதாரத்தை முன்மாதிரியாக எடுத்துக்கொள்ளுமாறு நிர்மலா சீதாராமனை கேட்டுக்கொள்வதாக மாநில முதல்வர் பூபேஷ் பாகல் கூறியுள்ளார்.

மோட்டார் வாகன உற்பத்தியில் ஏற்பட்டிருக்கும் தேக்க நிலை குறித்து மத்திய அமைச்சர் நிர்மலா சீதாராமன் கருத்து தெரிவித்தபோது, பொதுமக்கள் பிஎஸ் 6 வாகனத்தை விரும்புவதாலும், பதிவு கட்டணம் உயர்வாலும், பணம் வைத்திருப்பவர்கள் புதிதாக கார் வாங்குவதை விரும்பாமல் மெட்ரோ ரயில் மற்றும் உபேர், ஓலா போன்ற வாடகை கார்களை பயன்படுத்துவது உள்ளிட்ட பல்வேறு காரணங்களால் இந்த சரிவு ஏற்பட்டிருப்பதாக தெரிவித்தார்.

இதற்கு பதிலளிக்கும் விதமாக காங்கிரஸ் ஆட்சி நடக்கும் சத்தீஸ்கார் மாநில முதல்வர் பூபேஷ் பாகல் தனது டுவிட்டர் பக்கத்தில்,“உபேர், ஓலா போன்ற வாடகை கார் நிறுவனங்கள் சத்தீஸ்கார் மாநிலத்திலும் உள்ளன. ஆனால் இங்கு ஆட்டோமொபைல் துறை நன்கு முன்னேற்றம் அடைந்துள்ளது.

எனவே, நாட்டின் பொருளாதாரத்தை சரி செய்ய நிர்மலா சீதாராமன் சத்தீஸ்கார் மாநிலத்தின் பொருளாதாரத்தை முன்மாதிரியாக எடுத்துக்கொள்ளுமாறு கேட்டுக்கொள்கிறேன். மேலும் வேலை வாய்ப்புகளும் இங்கு அதிகரித்துள்ளது” என்று பூபேஷ் பாகல் பதிவிட்டுள்ளார்.