ஜம்முவில் கட்டுப்பாடுகள் முழுமையாக தளர்த்தப்பட்டுள்ளன: காவல்துறை மூத்த அதிகாரி தகவல்

14-08-2019 05:58 PM

ஸ்ரீநகர்

ஜம்முவில் கட்டுப்பாடுகள் முழுமையாக தளர்த்தப்பட்டுள்ளதாக மூத்த காவல்துறை அதிகாரி தெரிவித்துள்ளார்.

ஜம்மு காஷ்மீருக்கு வழங்கப்பட்டு வந்த சிறப்பு அந்தஸ்து ரத்து செய்யப்பட்டதுடன், அம்மாநிலத்தை 2 யூனியன் பிரதேசங்களாக பிரித்து மத்திய அரசு அதிரடி அறிவிப்பு வெளியிட்டது.
இதையடுத்து, அங்கு வன்முறை எதுவும் ஏற்படாமல் இருக்க பாதுகாப்பு பலப்படுத்தப்பட்டுள்ளது. ஜம்மு காஷ்மீர் முழுவதும் கடுமையான கட்டுப்பாடுகளும் விதிக்கப்பட்டுள்ளன. இணையதளம் மற்றும் தொலைத்தொடர்பு சேவைகளும் முடக்கப்பட்டுள்ளன. ஆகஸ்ட் 4ம் தேதி முதல் நீடிக்கும் கட்டுப்பாடுகளால் அங்கு இயல்பு வாழ்க்கை பாதிக்கப்பட்டுள்ளது.

இந்நிலையில், காவல்துறை கூடுதல் இயக்குநர் முனிர் கான் இன்று செய்தியாளர்களை சந்தித்துப் பேட்டியளித்தார். அப்போது பேசிய அவர்,

”ஜம்முவில் கட்டுப்பாடுகள் முழுமையாக தளர்த்தப்பட்டுள்ளது. மேலும், காஷ்மீரில் சில இடங்களில் அந்த கட்டுப்பாடுகள் தொடர்ந்து நீடிக்கும்” என்று தெரிவித்தார்.