நிபந்தனை இல்லாமல் வருகிறேன், எப்போது வரவேண்டும்: ஜம்மு காஷ்மீர் ஆளுநரிடம் ராகுல் காந்தி மீண்டும் கேள்வி

14-08-2019 01:01 PM

புதுடில்லி

எந்த நிபந்தனைகளும் இன்றி காஷ்மீருக்கு வர ஒப்புதல் தெரிவித்துள்ள ராகுல் காந்தி, தான் எப்போது வரவேண்டும் என்று ஆளுநர் சத்யபால் மாலிக்கிடம் கேள்வி எழுப்பியுள்ளார்.

ஜம்மு காஷ்மீருக்கு வழங்கப்பட்டிருந்த சிறப்பு அதிகாரத்தை மத்திய அரசு ரத்து செய்தது. மேலும், அம்மாநிலத்தை 2 யூனியன் பிரதேசங்களாக பிரித்து அறிவிப்பு வெளியிட்டது. இதற்கு காங்கிரஸ் கட்சி கடும் எதிர்ப்பு தெரிவித்தது.

இதற்கிடையில், காங்கிரஸ் கட்சியின் செயற்குழு கூட்டம் கடந்த ஆகஸ்ட்10ம் தேதி டில்லியில் நடைபெற்றது. அக்கூட்டத்திற்கு பின்னர் செய்தியாளர்களிடம் பேசிய ராகுல் காந்தியின் பேச்சுக்கு காஷ்மீர் ஆளுநர் சத்யபால் மாலிக் பதிலளித்தார்.

அவர் கூறுகையில்,

”காஷ்மீருக்கு வந்து பார்வையிடுமாறு நான் ராகுல் காந்திக்கு அழைப்பு விடுக்கிறேன். ஜம்மு காஷ்மீர் அரசுக்கு சொந்தமான விமானத்தை டில்லிக்கு அனுப்புகிறோம். அதில் காஷ்மீருக்கு வாருங்கள். இங்கு நிலைமை மிகவும் சீராகத்தான் உள்ளது என்பதை நேரில் தெரிந்துக் கொள்வீர்கள்” என கூறியிருந்தார்.

இந்நிலையில், ராகுல் காந்தி டுவிட்டரில் வெளியிட்டுள்ள பதிவில்,

”நானும் எதிர்க்கட்சி தலைவர்கள் குழுவும் உங்களின் (ஆளுநர்) அழைப்பை ஏற்று ஜம்மு காஷ்மீர் மற்றும் லடாக் பகுதியை பார்வையிட வருகிறோம்.

இதற்காக நீங்கள் எங்களுக்கு விமானம் அனுப்ப வேண்டியதில்லை. ஆனால், அங்கு சுதந்திரமாக பயணம் செய்து மக்களையும் முக்கிய அரசியல் கட்சி தலைவர்களையும், நமது ராணுவ வீரர்களையும் நாங்கள் சந்திப்பதை நீங்கள் உறுதிப்படுத்தினால் போதும்” என நேற்று கேட்டுக்கொண்டார்.

இதையடுத்து, ஆளுநர் சத்யபால் மாலிக் வெளியிட்ட அறிக்கையில்,

”காஷ்மீர் பகுதிக்கு வர, ராகுல் காந்தி பல முன்நிபந்தனைகளை விதித்து, அங்கு அமைதியற்ற சூழலை உருவாக்க முயற்சித்து வருகிறார்” என்று குற்றஞ்சாட்டினார்.

இந்நிலையில் இன்று தனது டுவிட்டர் பக்கத்தில் மீண்டும் ராகுல் காந்தி மீண்டும் ஒரு பதிவை வெளியிட்டுள்ளார். அதில்,

”அன்பிற்குரிய மாலிக் அவர்களே. என் டுவிட்டிற்கு உங்கள் பலவீனமான பதிலை கண்டேன்.

எவ்வித கட்டுப்பாடும் இன்றி, நான் காஷ்மீர் வந்து, அங்குள்ள மக்களை சந்திக்கிறேன் எனக் கூறிவிட்டேன். முன் நிபந்தனை எதுவும் கிடையாது. எப்போது நான் வர வேண்டும்?” என ராகுல் காந்தி கேள்வி எழுப்பியுள்ளார்.