தேசத்துரோக வழக்கு: மேல்முறையீடு ஏன்? என்ற கேள்விக்கு ஆவேசமாக பதிலளித்த வைகோ

15-07-2019 05:57 PM

சென்னை,

தேசத்துரோக வழக்கில் சிறப்பு நீதிமன்றம் வழங்கிய தீர்ப்பை எதிர்த்து மேல்முறையீடு செய்தது ஏன்? என்ற கேள்விக்கு மதிமுக பொதுச் செயலாளர் வைகோ ஆவேசமாக பதில் அளித்தார்.

அவதூறு வழக்கு விசாரணைக்காக சென்னை உயர்நீதிமன்றத்தில் மதிமுக பொதுச்செயலாளர் வைகோ இன்று ஆஜரானார்.

பின்னர் செய்தியாளர்களுக்கு வைகோ பேட்டி அளித்தார். அப்போது அவர் கூறியதாவது:

விடுதலை புலிகளுக்காக வி.பி.சிங்கிடம் வாதாடியவன் நான்; இனப்படுகொலை செய்தவர்கள் யாரும் தப்ப முடியாது. சிறுபான்மை மக்களுக்கு எதிராக மத்திய அரசு செயல்படுகிறது.

அவதூறு வழக்கில் மேல்முறையீடு செய்வேன். எனக்கு ஆயுள் தண்டனை கொடுத்தாலும் மகிழ்ச்சியோடு ஏற்பேன், மன்னிப்பு மட்டும் கேட்க மாட்டேன். இலங்கையில் இனப்படுகொலை செய்த ராஜபக்சே தப்பிக்க முடியாது என்று வைகோ கூறினார்.

அஞ்சல் துறை போட்டி தேர்வில் தமிழ் புறக்கணிப்பு குறித்து கடும் எதிர்ப்பு தெரிவித்தார் வைகோ.

எதிர்காலத்தில் தமிழர்கள் எந்த தேர்வையும் எழுத முடியாத நிலை ஏற்படும் என கவலை தெரிவித்தார். இந்தியாவை உடைக்க வேண்டும் என மத்திய அரசு ஏற்கனவே முடிவு செய்துவிட்டதாகவும், இதற்காக வழக்கு போட்டாலும் சந்திக்க தயாராக இருப்பதாகவும் வைகோ தெரிவித்தார்.

தேசத்துரோக வழக்கில் சிறப்பு நீதிமன்றம் வழங்கிய தீர்ப்பை எதிர்த்து மேல்முறையீடு செய்தது ஏன்? என செய்தியாளர் ஒருவர் கேள்வி எழுப்பினார்.

இந்த கேள்வியால் சற்று ஆவேசம் அடைந்தார் வைகோ, இவ்வாறு என்னிடம் கேள்வி கேட்பதில் ஏதோ உள்நோக்கம் உள்ளது. இவ்வழக்கில் எனக்கு ஆயுள் தண்டனை அளித்தாலும் ஏற்றுக்கொள்வேன். மன்னிப்பு கேட்கமாட்டேன். விடுதலைப்புலிகளை நான் ஆதரிக்கிறேன் என தொடர்ந்து சொல்லி வருகிறேன்.

இலங்கையில் இனப்படுகொலை செய்த ராஜபக்சேவுக்கு தண்டனை உறுதி, காங்கோ அதிபருக்கு கிடைத்த தண்டனை போல் மஹிந்த ராஜபக்சேவுக்கும் தண்டனை கிடைக்கும். இனப்படுகொலை செய்த யாரும் தண்டனையிலிருந்து தப்ப முடியாது என வைகோ ஆவேசமாகக் கூறினார்.