அவதூறு வழக்கில் வைகோவை விடுவிக்க சென்னை உயர்நீதிமன்றம் மறுப்பு

20-06-2019 01:31 PM

சென்னை,

ம.தி.மு.க. பொதுச்செயலாளர் வைகோவுக்கு எதிராக தமிழ்நாடு அரசு தொடர்ந்த 2 அவதூறு வழக்குகளில் ஒரு வழக்கில் அவரை விடுவித்த சென்னை உயர்நீதிமன்றம் மற்றொரு வழக்கில் விடுவிக்க மறுத்துவிட்டது.

ம.தி.மு.க.வை இரண்டாக உடைக்க முயற்சிப்பதாக மறைந்த முதலமைச்சர் கருணாநிதிக்கு எதிராக 2006-ஆம் ஆண்டில் முன்னாள் பிரதமர் மன்மோகன் சிங்குக்கு வைகோ கடிதம் எழுதினார்.

2009-ஆம் ஆண்டு திரைப்பட இயக்குனர் பாரதிராஜா அலுவலகம் மீதான தாக்குதலுக்கு கருணாநிதிதான் காரணம் என பொதுக்கூட்டம் ஒன்றில் வைகோ பேசினார்.

இவை தொடர்பான தமிழ்நாடு அரசின் அவதூறு வழக்குகள் எம்.பி, எம்.எல்.ஏ.க்கள் சிறப்பு நீதிமன்றத்தில் நிலுவையில் உள்ளன. 

இந்த வழக்குகளில் இருந்து விடுவிக்கக் கோரிய வைகோவின் மனுக்களை விசாரித்த நீதிபதி, இயக்குநர் பாரதிராஜா அலுவலகம் தாக்குதல் குறித்து வைகோ பேசிய வழக்கில் விடுவித்தும், முன்னாள் பிரதமர் மன்மோகன் சிங்குக்கு கடிதம் எழுதிய வழக்கில் வைகோவை விடுவிக்க மறுத்தும் உத்தரவிட்டார்.