அமெரிக்காவின் ஆளில்லா விமானத்தை ஈரான் சுட்டுவீழ்த்தியதாக தகவல்

20-06-2019 11:58 AM

தெஹ்ரான்

அமெரிக்காவின் ஆளில்லா உளவு விமானத்தை சுட்டு ஈரான் வீழ்த்தியுள்ளதாக ஈரானில் ஊடகங்கள் செய்தி வெளியிட்டுள்ளது.

ஈரானுடனான அணுசக்தி ஒப்பந்தத்தை முறித்துக்கொண்ட அமெரிக்கா, ஈரானுடன் மோதல் போக்கை கடைபிடித்து வருகிறது. ஈரானுக்கு எதிராக கடுமையான பொருளாதார தடைகளையும் அமெரிக்கா விதித்துள்ளது. அமெரிக்காவின் மிரட்டலுக்கு அஞ்ச மாட்டோம் என்று ஈரானும் பதிலடி கொடுத்து வருகிறது.

சமீபத்தில் ஓமன் வளைகுடாவில் எண்ணெய் கப்பல்கள் மீது தாக்குதல் நடத்தப்பட்டது. இந்த தாக்குதலுக்கு ஈரானே காரணம் என்று அமெரிக்காவும், ஈரான் அமெரிக்கா மீதும் பரஸ்பரம் குற்றஞ்சாட்டின.

இந்நிலையில், ஈரானின் தெற்கு பகுதியில் உள்ள ஹோர்மஸ்கான் என்ற பிராந்திய பகுதிக்குள் வந்த அமெரிக்காவின் ஆளில்லா உளவு விமானம் சுட்டு வீழ்த்தப்பட்டதாக ஈரான் ஊடகங்கள் செய்து வெளியிட்டுள்ளன. எனினும், அதன் படங்களை அவை வெளியிடவில்லை.

ஆனால், உடனடியாக பதில் எதுவும் கூற முடியாது என்று அமெரிக்க தரப்பில் தெரிவிக்கப்பட்டுள்ளது.