அமெரிக்காவில் அதிபர் தேர்தலுக்கான பிரச்சாரத்தை தொடங்கினார் டொனால்ட் டிரம்ப்

19-06-2019 09:47 AM

ஒர்லாண்டோ,             

அமெரிக்காவில் அதிபர் பதவிக்கு மீண்டும் போட்டியிடும் டொனால்ட் டிரம்ப், அதற்கான பிரசாரத்தை நேற்று தொடங்கினார்.

அமெரிக்காவில் அதிபரின் பதவிக்காலம் 4 ஆண்டுகள் ஆகும். இதன்படி, கடந்த 2016ம் ஆண்டு நடைபெற்ற தேர்தலில் குடியரசுக் கட்சி சார்பில் போட்டியிட்ட டொனால்ட் டிரம்ப், ஜனநாயக கட்சி வேட்பாளர் ஹிலாரி கிளிண்டனை வீழ்த்தி வெற்றிபெற்று அமெரிக்காவின் 45வது அதிபராக பதவியேற்றுக்கொண்டார்

டொனால்ட் டிரம்பின் பதவிக்காலம் அடுத்த ஆண்டு முடிவடைய உள்ள நிலையில், 2வது முறையாக தான் அதிபர் தேர்தலில் போட்டியிட இருப்பதாக சமீபத்தில் அறிவித்தார்.

இந்நிலையில், அடுத்த ஆண்டு நடைபெறும் அதிபர் தேர்தலுக்கான பிரச்சாரத்தை டொனால்ட் டிரம்ப் நேற்று முறைப்படி தொடங்கினார். புளோரிடா மாகாணத்தில் உள்ள ஒர்லாண்டோவில் டொனால்ட் டிரம்ப் பிரசாரத்தை தொடங்கினார்.

சுமார் 20,000 பேர் திரண்டிருந்த கூட்டத்தில் பேசிய டொனால்ட் டிரம்ப், ”நாம் ஒருமுறை செய்து காட்டியுள்ளோம். மீண்டும் ஒருமுறை அதை செய்து காட்டுவோம். இம்முறை நம் பணியை முடித்துக்காட்ட இருக்கிறோம்” என்று கூறினார்.

“நம் பொருளாதாரத்தை கண்டு உலகமே பொறாமை கொள்கிறது. அமெரிக்காவை மீண்டும் சிறந்த நாடாக வளர்ச்சி பெறச்செய்வோம். இதுவரை இல்லாத அளவிற்கு சிறந்த நாடாக ஆக்குவோம். என் ஆட்சிக்காலத்தில் பொருளாதார வளர்ச்சியுடன் வேலைவாய்ப்பும் அதிகரித்திருப்பதால், இரண்டாவது முறையாக மக்கள் எனக்கு வாய்ப்பு வழங்குவார்கள்” என அதிபர் டிரம்ப் நம்பிக்கை தெரிவித்துள்ளார்.

அமெரிக்காவில் அடுத்த ஆண்டு நவம்பர் 3ம் தேதி அதிபர் தேர்தல் நடைபெறவுள்ளது என்பது குறிப்பிடத்தக்கது.