சர்வதேச கிரிக்கெட் போட்டியில் இருந்து ஓய்வு - யுவராஜ் சிங் அறிவிப்பு

10-06-2019 02:44 PM

மும்பை,

சர்வதேச கிரிக்கெட் போட்டிகளில் இருந்து ஓய்வு பெற இருப்பதாக  இந்திய கிரிக்கெட் வீரர் யுவராஜ் சிங் இன்று அறிவித்துள்ளார்.

இந்திய கிரிக்கெட் அணியில் 2000ஆம் ஆண்டில் கென்யாவுக்கு எதிரான போட்டியில் யுவராஜ் சிங் அறிமுகமானார். 37 வயதாகும் யுவராஜ் சிங், இதுவரை இந்திய அணிக்காக 40 டெஸ்ட் போட்டிகள், 304  ஒரு நாள் போட்டிகள், 58 டி20 போட்டிகளில் விளையாடியுள்ளார்.

2011ம் ஆண்டு நடைபெற்ற 50 ஓவர் உலகக் கோப்பை தொடர்களில் இந்திய அணி கோப்பையை கைப்பற்ற பெரும் பங்கு வகித்தவர் யுவராஜ் சிங். தொடர் நாயகன் விருதையும் வென்றார் யுவராஜ் சிங்.

2011ஆம் ஆண்டு புற்றுநோயால் பாதிக்கப்பட்ட யுவராஜ் சிங்கால் மீண்டும் தனது பழைய அதிரடியை தொடர முடியவில்லை. ஐபிஎல் உள்ளிட்ட அனைத்து போட்டிகளிலும் சரிவை சந்திக்கத் தொடங்கினார்.

இந்த நிலையில் சர்வதேச கிரிக்கெட் போட்டிகளில் இருந்து ஓய்வு பெறுவதாக இன்று யுவராஜ் சிங் அறிவித்தார்.

25 ஆண்டு கிரிக்கெட் வாழ்க்கை எனக்கு நிறைய கற்றுக் கொடுத்துள்ளது. தற்போது சர்வதேச கிரிக்கெட்டிலிருந்து ஓய்வுபெற விரும்புகிறேன். கிரிக்கெட் எனக்கு போராட கற்றுக்கொடுத்தது. எப்போது எல்லாம் கீழே விழுந்தேனோ அப்போதெல்லாம் எழுந்து நிற்கவும், மீண்டும் முன்நோக்கி செல்ல ஊக்குவிப்பதாகவும் இருந்தது.

இந்திய அணிக்காக 400 போட்டிகளுக்கு மேல் விளையாடியது என் அதிர்ஷ்டம்.

28 ஆண்டுகளுக்கு பிறகு உலகக் கோப்பையை வென்ற அணியில் இடம்பெற்றதைவிட வேறென்ன வேண்டும்.

என் கிரிக்கெட் வாழ்க்கையில் நான் மிகவும் மோசமாக விளையாடியது 2014ம் ஆண்டு நடந்த டி20 உலகக் கோப்பை இறுதிப் போட்டியில்தான். அப்போட்டியில் 21 பந்துகளில் 11 ரன்கள் எடுத்தேன். அப்போதே என் கிரிக்கெட் வாழ்க்கை முடிவுக்கு வந்ததை உணர்ந்தேன்  என கூறினார்.

சர்வதேச கிரிக்கெட் போட்டியில் இருந்து ஓய்வு என்ற முடிவை இந்திய கிரிக்கெட் வீரர் யுவராஜ் சிங் அறிவித்திருப்பது ரசிகர்களை சோகத்தில் ஆழ்த்தியுள்ளது.