தம்பதியர் மனக்கவலை போக்கும் கொடும்பு சுப்ரமணியர்! – ஜே.வி.நாதன்

08-06-2018 02:53 PM

கேரள மாநிலம், பாலக்காட்டுக்கு தென்கிழக்கில் ஐந்து கி.மீ., தூரத்தில் கொடும்பு எனுமிடத்தில் உள்ளது சுப்ரமணியர் ஆலயம். அருணகிரிநாதர் தன் திருப்புகழில் இந்த சுப்ரமணியரைப் பாடியிருக்கிறார். வள்ளி, தேவசேனா  சமேதராக அற்புத திருக்கோலத்தில் காட்சி தரும் இந்த சுப்ரமணியரின் ஆலயக் கோபுரம், கோயிலுக்கு முன் உள்ள தேர்கள், தேர் மண்டபம் யாவும் தமிழ்நாட்டு ஆலயங்களில் இருப்பதைப் போலவே இருப்பதால், இங்கு சென்றபோது கேரள மண்ணில் இருக்கும் உணர்வே நமக்கு ஏற்படவில்லை!

தமிழகத்திலிருந்து இடம்பெயர்ந்து வசித்த 32 செங்குந்த முதலியார் வகுப்பினர், இங்கு நெசவு செய்து ஜீவனம் நடத்தி வந்தார்கள். தாங்கள் நெய்த துணிகளைத் தமிழ்நாட்டு அவினாசிப் பக்கம் போய் விற்று, அங்கிருந்து நூல் வாங்கி வருவது நெசவாளர்களின் வழக்கம்!

மாட்டு வண்டி கட்டி அவினாசி பயணித்தபோது, வழியில் கோழி மாம்பட்டி எனும் ஊரின் அருகில் காட்டில் ‘‘நானும் வர்றேன், நானும் வர்றேன்!’’ என்று ஒரு அமானுஷ்யக் குரல் கேட்டதாம். வண்டியை நிறுத்தி சுற்றுமுற்றும் பார்த்தால் யாரும் இருப்பதாகத் தெரியவில்லை! துணிகளை விற்று, அந்தப் பணத்தில் நூல் கொள்முதல் செய்து திரும்பி வரும்போது அதே இடத்தில் ‘‘நானும் வர்றேன்’’ என்ற குரல் கேட்க, வண்டியை நிறுத்தி, தேடிப் பார்த்திருக்கிறார்கள். ஒரு பொந்தின் உள்ளிருந்து அந்தக் குரல் வந்ததைக் கண்டுபிடித்தார்கள். ‘‘என்னை இங்கே வீசிவிட்டுப் போயிட்டாங்க. நானும் வர்றேன்!’’ என்று குரல் கேட்டதாம். அந்தப் பொந்தினுள் தேடிப் பார்த்தபோது, அங்கு ஒரு முருகன் சிலை கிடைத்திருக்கிறது!

வண்டியில் நெசவாளர்கள் அந்த முருகன் சிலையை ஏற்றிக் கொண்டு வந்தார்கள். கொடும்புவில் இந்த வண்டி வந்து நின்ற இடத்தை ஆதி மூல ஸ்தானமாகக் கருதி, ஆண்டுக்கு ஒரு முறை சிலை வந்து சேர்ந்த நாளில் பூஜைகள் செய்யப்படுகின்றன.

இந்த இடத்துக்கு அருகில் பழமையான சிவன் கோயில் ஒன்று இருக்கிறது. இந்த சிவன் கோயிலில் ஒரு தனிசன்னிதி ஏற்படுத்தி, கோழி மாம்பட்டியிலிருந்து கொண்டுவந்த சுப்ரமண்யரைப் பிரதிஷ்டை செய்தார்கள்.

இந்த ஆலயத்தில் சுப்ரமண்யர் திருவுருவச் சிலையை நிறுவுவதற்கு முன் குரூர் மனை அச்சுதன் நம்பூதிரி என்பவர் சிவபெருமானுக்கு கேரள முறைப்படி பூஜைகளைச் செய்து வந்தார். சுப்ரமண்யருக்கும் தாமே கேரள முறைப்படி பூஜைகள் மற்றும் திருவிழாக்களைச் செய்வதாக அவர் கூறினார். அதைக் கொடும்பு முதலியார் சமூகத்தினர் ஏற்கவில்லை; தமிழ்நாட்டிலிருந்து வந்த முருகக் கடவுளுக்குத் தமிழ்நாட்டுப் பாணியில்தான் பூஜை, வழிபாடுகள் செய்ய வேண்டும் என்று வலியுறுத்தினர். இதனை அச்சுதன் நம்பூதிரி ஒப்பவில்லை. எனவே, பாலக்காட்டை ஆண்ட அரசரிடம் நம்பூதிரி முறையீடு செய்தார்.

ராஜா தனது அமைச்சர் பரிவாரங்களுடன் கொடும்பு வந்து சேர்ந்தார். செங்குந்த முதலியார்கள் ஒரு புறம், குரூர் மனை அச்சுதன் நம்பூதிரி மறுபுறம்... பஞ்சாயத்து நடுவராக பாலக்காடு ராஜா.

இறுதியில், கோயில் வடக்கு வாசலில் இரு தரப்பினரும் கும்பங்கள் வைக்க வேண்டும். அதை யார் எடுக்கிறார்களோ அவர்தான் முருகனுக்கு பூஜை நடத்த வேண்டும் என்று மன்னன் கூற அனைவரும் அதை ஏற்றனர்.

செங்குந்த வகுப்பினர் சார்பாக மதுரையிலிருந்து மாணிக்கவாசகர் வரவழைக்கப்பட்டார். அவர் தமிழ் பாடி ஒரு கலசம் வைத்தார். அச்சுதன் நம்பூதிரி மந்திரம் ஜெபித்து ஒரு கலசம் வைத்தார். மாணிக்கவாசகர் வைத்த கலசத்தை நம்பூதிரியால் எடுக்க முடியவில்லை; நம்பூதிரி வைத்த கலசத்தை மாணிக்கவாசகர் எடுத்துவிட்டாராம்.

எனவே, தமிழ் முறைப்படிதான் முருகக் கடவுளுக்குப் பூஜைகள் நடக்க வேண்டும் என்று மன்னன் உத்தரவிட்டான்.

தான் தோற்று விட்டதால், அச்சுதன் நம்பூதிரி கொடும்புவிலிருந்து 2 கி.மீ. தூரத்துக்கு உள்ள நிலங்களை சுப்ரமண்ய ஸ்வாமிக்குத் தானமாக சாஸனம் எழுதித் தந்து விட்டார். அவர் அளித்த தானத்துக்கு ஈடாக, அச்சுதன் நம்பூதிரியின் குரூர் மனையைச் சுற்றி சுப்ரமண்யர் திருமஞ்சனக் கலசம் வருடத்துக்கு நான்கு முறை வீதியுலாவாக வரும் என்று செங்குந்த முதலியார் குடும்பத்தினர் ஒப்புதல் அளித்தனர். தைப்பூசம், சூர சம்ஹாரம், முருகன் பிரதிஷ்டை தினம் மற்றும் நவராத்திரி ஆகியவையே அந்த நான்கு திருவீதியுலாத் தருணங்கள்!

பழனி முருகனின் சக்தியில் பாதியைக் கலசத்தில் ஆவாகணம் செய்து மாணிக்கவாசகர் முருகனுக்கு அபிஷேகம் செய்து, முதன்முதலில் பூஜையைத் துவக்கி வைத்தார். அதனால், பழனி ஆண்டவனின் சக்தியில் பாதி, கொடும்பு முருகனைத் தரிசனம் செய்தால் பக்தர்களுக்குக் கிடைக்கும் என்பதாக ஓர் ஐதீகம் இங்கு நிலவுகிறது!

கோயிலுக்கு அருகே ஓடும் நதிக்கு ‘சோகநாசினி’ என்று பெயர். இதில் குளிப்பவர்களின் சோகங்கள் தொலைந்து போகுமாம்! இந்த நதியில் 12 வருடங்களுக்கு ஒரு முறை நடக்கும் மகாமகத் திருவிழா சிறப்பாக நடத்தப்படுகிறது. கும்பகோணத்தில் நடக்கும் அதே தினத்தில் இங்கும் மகாமகத் திருவிழா நடத்தப்படுவது குறிப்பிடத்தக்கது!

கொடும்பு முருகன் கோயில் ஆதியில் சிவன் கோயிலாக இருந்ததற்கு சாட்சியாக, கோயில் சுற்றுப்புற மதிற்சுவரின் நான்கு மூலைகளிலும் நந்தி சிலை வைக்கப்பட்டிருப்பதை நாம் காண முடிகிறது. ஆதி மூலவரான சிவபெருமான், பார்வதி, கோழி மாம்பட்டியிலிருந்து வந்த வள்ளி தேவசேனா சமேத முருகன் தவிர, நந்தி, கோசல கிருஷ்ணன், பரசுராமர், சிம்மோதரன், ஐயப்பன், நாக தேவதை, தட்சிணாமூர்த்தி, சண்டிகேஸ்வரர், வீரபாகு, காலபைரவர், நவக்கிரகங்கள் ஆகியோரின் திருவுருவச் சிலைகள் இந்த ஆலயத்தில் காட்சியளிக்கின்றன..

முருகன் ஆலயம் என்பதால் அவன் வாகனமான மயில் ஒன்றை ஆலயத்தில் வளர்க்கலாம் என்று ஆலய நிர்வாகிகள் எண்ணினர். அருகாமை ஊரான சித்தூரில் பிரபலமான ஓர் நாயர் வீட்டில் இரண்டு மயில்களை வளர்த்து வருவதாகக் கேள்விப்பட்டு அங்கு சிலர் சென்று, கொடும்பு முருகனுக்கு ஒரு மயிலைக் கொடுக்க முடியுமா என்று கோரினர்.

அதற்கு ’’தர முடியாது’’ என்று மறுத்ததுடன், அந்தக் குடும்பத்தின் காரணவர் (தலைவர்) மயில் கோரிப் போனவர்களை ஏளனமாகவும் பேசித் திருப்பியனுப்பி விட்டாராம்.

அடுத்த நாள் ஒரு அதிசயம் நிகழ்ந்தது. மயில் தர மறுத்தவர்கள் குடும்பத்தினர் அனைவருக்கும் திடீரென்று குளிர் ஜுரம் வந்து உடல் நடுங்கத் தொடங்கியதாம்.. முருகன் ஆலயத்துக்கு மயில் தர மறுத்ததுடன் ஏளனமாகவும் பேசியதுதான் தங்கள் திடீர் நோய்க்குக் காரணம் என்று நினைத்த அக்குடும்பத்தார் உடனே தங்களிடமிருக்கும் மயில்களில் ஒன்றை ‘கொடும்பு’ ஆலயத்துக்கு வழங்கினார்கள்.

அவர்கள் நினைத்தது உண்மை என்பதைப் போல மயில் ஆலயத்துக்கு வழங்கப்பட்டதும் குடும்பத்தினருக்கு உடல் நலம் திரும்பி விட்டதாம்.

இதன் நினைவாக அக்குடும்பத்தார் முருகன் ஆலயத்தில் கொண்டாடப்படும் தைப்பூசத் திருவிழாவின்போது தங்கள் செலவில் பக்தர்களுக்கு அன்னதானம் செய்வது இன்றளவும் வழக்கமாக உள்ளது.

ஆலய டிரஸ்டிகளில் ஒருவரான சண்முகம் நம்மிடம் சொன்னார்: ‘‘மாணிக்கவாசகர் ஸ்தாபித்த முருகன் என்பது இந்த முருகனின் தனிசிறப்பு. இந்த ஆலயத்தின் தல விருட்சம் செண்பக மரம். இங்கு 12 வருடங்களுக்கு ஒரு முறை மகாமகம், தினம் 3 கால பூஜைகள், ஞாயிறு, வெள்ளிக்கிழமைகளில் சிறப்பு பூஜைகள் நடக்கின்றன. கந்த சஷ்டி, திருவோணம், நவராத்திரி, தீபாவளி ஆகியவையும் சிறப்பாகக் கொண்டாடப்படுகின்றன. தைப்பூசத் திருவிழா 7-வது நாளில் ரத உற்சவம். அச்சமயத்தில் லட்சக்கணக்கான பக்தர்கள் இங்கு கூடுகிறார்கள். சிறப்பு பூஜைகளில் முருகனுக்கு பஞ்சாமிர்தம், பாயஸம் தயாரித்து விசேஷமாகப் படைத்து மகிழ்வது பக்தர்களின் பழக்கம்!’

ஆலய அர்ச்சகர்களில் ஒருவரான ராமசாமியை சந்தித்தோம். ‘‘காலை 5.-30 மணிக்கு கோயில் நடை திறக்கப்பட்டு மதியம் 12 மணிக்கு மூடப்படுகிறது, மாலை 4-.30 மணிக்கு மீண்டு திறந்து இரவு 8 மணிக்குக் கோயிலை மூடுகிறோம்.

இங்கு முருகர் சிலை முதன்முதலில் மாட்டு வண்டியில் வந்து நின்ற இடம், தேவன் தறவாட்டு (குடும்பம்) அருகில். எனவே, அந்தக் குடும்பத்தினர் இந்த ஆதி மூல ஸ்தானத்துக்கு ஆண்டுக்கு ஒரு முறை சிலை வந்து நின்ற நாளில் பூஜை நடத்தி சிறப்பிக்கிறார்கள்.

இந்த ஆலயத்தில் நிறையத் திருமணங்கள் நடக்கின்றன. வள்ளி, தேவசேனா சமேத முருகன் ஒரே கல்லில் இங்கு காட்சியளிக்கிறார். திருமணம் செய்து கொள்வோர் மட்டுமல்லாது, திருமணம் ஆன தம்பதியருக்குள் மனக்கசப்பு ஏற்பட்டாலும், இங்கு வந்து முருகனைப் பிரார்த்தித்தால், மனக்கசப்பு விலகி மகிழ்வான குடும்ப வாழ்க்கை அமையும் என்பது பக்தர்களின் நம்பிக்கை! ஏராள தம்பதிகள் இங்கு வந்து மனைவியருடன் மகிழ்ச்சியாகக் காட்சி தரும் முருகக் கடவுளைத் தரிசித்து, பூஜித்து அவன் அருளை வாரிக்கொண்டு திரும்புகிறார்கள்!’’ என்றார் ஆலய கீழ்சாந்தியான ராமசாமி.

பாலக்காடு அருகில் உள்ள ‘கொடும்பு சுப்ரமண்யர் ஆலயம்’ சென்று முருகனைத் தரிசித்து மனமகிழ்ச்சி பெற முடிவு செய்து விட்டீர்களா?

---* * *




Trending Now: