சுய உதவி குழுக்களுக்கு கடன் வழங்குவதற்கு முன்னுரிமை :தளவாய்சுந்தரம் பேச்சு

20-08-2019 12:37 AM

நாகர்கோவில்:

தாழக்குடி தொடக்க வேளாண்மை கூட்டுறவு கடன் சங்கத்தில் நடந்த விழாவில் விவசாயிகள் மற்றும் மகளிர் சுயஉதவி குழுக்களுக்கு ரூ. 82 லட்சம் மதிப்பில் கடனுதவிக்கான காசோலைகளை தமிழக அரசின் டில்லி சிறப்பு பிரதிநிதி வழங்கினார்.

தாழக்குடி தொடக்க வேளாண்மை கூட்டுறவு கடன் சங்கத்தில் நடந்த விழாவில் புதிதாக தேர்ந்தெடுக்கப்பட்டுள்ள நிர்வாக குழு உறுப்பினர்களுக்கு பாராட்டும், விவசாயிகள் மற்றும் மகளிர் சுய உதவி குழுக்களுக்கு ரூ. 82 லட்சம் மதிப்பில் கடனுதவிக்கான காசோலையினை தமிழக அரசின் டில்லி சிறப்பு பிரதிநிதி தளவாய்சுந்தரம் வழங்கி பேசியதாவது, கூட்டுறவு சங்க சட்டமானது மிக கடுமையான சட்டமாகும். சங்க உறுப்பினர்கள், அலுவலர்கள் யாராக இருந்தாலும் தவறுகள் நேராத வண்ணம் மிக கவனமாக செயலாற்ற வேண்டும். தவறுகள் நடக்கும்பட்சத்தில் கடுமையான சட்டத்திற்கு ஆட்பட்டு மீளமுடியாத துயரத்தையும், இன்னங்களையும் அனுபவிக்க நேரிடும். தாழக்குடி கூட்டுறவு கடன் சங்கமானது மகளிர் சுய உதவி குழுக்களுக்கு அதிக அளவில் கடனுதவிகள் வழங்கி வருகிறது. பொதுமக்களும் கூட்டுறவு சங்க உறுப்பினர்களும் இந்த சங்கத்திற்கு அதிக வைப்பு நிதிகளை செலுத்தி அதிக கடனுதவிகளை அளித்து விவசாயிகளுக்கு உதவுவதோடு சங்கத்திற்கு லாபத்தை ஈட்டவும் வேண்டும். இந்த ஆண்டு கூட்டுறவு சங்கங்களின் மூலம் கடன் உதவி வழங்குவதில் மாநிலத்திலேயே சேலம் மாவட்டம் தான் முதலாவதாக இருக்கிறது. அடுத்த ஆண்டு நமது மாவட்டம் மாநிலத்திலேயே முதல் மாவட்டமாக திகழ வேண்டும். எனவே கூட்டுறவு சங்க உறுப்பினர்களுக்கும் பொதுமக்களுக்கும் இடையே நல்லுறவை உருவாக்கி அனைவரும் இணைந்து செயல்பட்டால் இலக்கை நாம் அடையலாம். புதிதாக தேர்ந்தெடுக்கப்பட்ட உறுப்பினர்கள் அனைவருக்கும் பாராட்டுக்களை தெரிவித்துக் கொள்கிறேன். இந்த சங்கத்தின் மூலம் அதிக முதலீடுகளை ஈட்டி பொதுமக்களுக்கும், சுய உதவி குழுக்களுக்கும் அதிக கடன்களை வழங்கி அவர்களின் வளர்ச்சிக்கு உதவ வேண்டும். சுய உதவி குழுக்கள் தான் கடன்களை காலதாமதமின்றி குறிப்பிட்ட காலத்திற்குள் கட்டி முடிப்பார்கள். சுய உதவி குழுக்களுக்கு கடன் வழங்குவதற்கு முன்னுரிமை அளிக்க வேண்டும். இவ்வாறு அவர் பேசினார். விழாவில் நாகரெத்தினம் வரவேற்றார். கன்னியாகுமரி மாவட்ட மத்திய கூட்டுறவு வங்கி மேலாண்மை இயக்குநர் சுப்பையா,  நாகர்கோவில் சரக கூட்டுறவு சங்கங்களின் துணைப்பதிவாளர் சங்கரன், ஆர்லவாய்மொழி தொடக்க வேளாண்மை கூட்டுறவு கடன் சங்கத் தலைவர் கிருஷ்ணகுமார், தாழக்குடி தொடக்க வேளாண்மை கூட்டுறவு கடன் சங்க தலைவர் பிரம்ம நாயகம், கடன் சங்க அலுவலர்கள், சங்க உறுப்பினர்கள், அரசியல் பிரமுகர்கள் உட்பட பலர் கலந்து கொண்டனர்.