2வது மனைவியின் 14 வயது மகளுக்கு பாலியல் தொல்லை: போக்சோ சட்டத்தின் கீழ் 2வது கணவர் கைது

28-07-2019 09:20 AM

சென்னை:

2வது மனைவியின் 14 வயது மகளுக்கு பாலியல் தொல்லை கொடுத்த, 2 கணவர் போக்சோ சட்டத்தின் கீழ் கைது செய்யப்பட்டு சிறையில் அடைக்கப்பட்டார்.

சென்னை எம்ஜிஆர் நகரைச் சேர்ந்தவர் பிரசிதா  (பெயர் மாற்றப்பட்டுள்ளது) (வயது 39). இவரது கணவரை கடந்த 2013ம் ஆண்டு விவாகரத்து செய்து விட்டு, தனது 14 வயது மகளுடன் வசித்து வருகிறார். கடந்த 2 ஆண்டுகளுக்கு முன்பு பாலசுப்பிரமணியன் என்பவர் பிரசிதாவுக்கு அறிமுகமானார். அவரும் தனது மனைவியைப் பிரிந்து தனது 17 வயது மகனுடன் வசித்து வருகிறார். பிரசிதாவும், பாலசுப்பிரமணியனும் அறிமுகமாகி திருமணம் செய்து கொண்டனர். பிரசிதா, பாலசுப்பிரமணியம் மற்றும் பிரசிதாவின் 14 வயது மகள், பாலசுப்பிரமணியத்தின் 17 வயது மகன் என 4 பேரும் ஒரே வீட்டில் வசித்து வந்தனர். இந்நிலையில் பிரசிதா வேலைக்கு சென்ற பின்னர் பாலசுப்பிரமணியம், 14 வயது மகளிடம் பாலியல் ரீதியாக வன்முறையில் ஈடுபட்டு வந்துள்ளார். தாய் வேலை விட்டு வீட்டுக்கு வந்ததும் அது குறித்து சொல்லி சிறுமி அழுதுள்ளார். இதனால் கணவன், மனைவிக்கிடையே தகராறு ஏற்பட்டது.

இதுதொடர்பாக பிரசிதா வடபழனி அனைத்து மகளிர் போலீசில் புகார் அளித்தார். போலீசார் நடத்திய விசாரணையில் பிரசிதாவின் மகளுக்கு பாலசுப்பிரமணியம் கடந்த சில மாதங்களாக பாலியல் தொந்தரவு கொடுத்தது உண்மை என தெரியவந்தது. இதனையடுத்து போலீசார் பாலசுப்பிரமணியம் மீது போக்சோ பிரிவின் கீழ் வழக்குப் பதிவு செய்து அவரை கைது செய்தனர். விசாரணைக்குப் பின்னர் அவரை போலீசார் கோர்ட்டில் ஆஜர்படுத்தி சென்னை புழல் மத்திய சிறையில் அடைத்தனர்,.