குடிபோதையில் தகராறு: தீக்குளித்த கணவன் உயிரிழப்பு காப்பாற்றச் சென்ற மனைவியும் பலி

28-07-2019 09:19 AM

சென்னை:

குடிபோதையில் ஏற்பட்ட தகராறில் கணவன் உடலில் மண்ணெண்ணை ஊற்றி தீக்குளித்து இறந்தார். காப்பாற்ற போன மனைவியும் பரிதாபமாக பலியானார்.

சென்னை, திரிசூலம் பகுதியைச் சேர்ந்தவர் அய்யனார். (வயது 35). இவரது மனைவி கிருஷ்ணம்மாள் (26). அய்யனார் லாரி டிரைவராக வேலை பார்க்கிறார். கடந்த 6 மாதங்களுக்கு முன்பு இருவரும் காதலித்து திருமணம் செய்து கொண்டனர். திருமணத்துக்கு பின்னர் பீர்க்கன்கரணை பகுதியில் தனியாக வீடு எடுத்து வாழ்ந்து வந்தனர். அய்யனார் அடிக்கடி குடித்து விட்டு வீட்டுக்கு வந்ததால் கணவன், -மனைவி இடையே தகராறு ஏற்பட்டது. நேற்று முன்தினம் இரவும் கணவன் மனைவி இடையே வழக்கம் போல தகராறு ஏற்பட்டது. இதனால் ஆத்திரமடைந்த ருஷ்ணம்மாள் அடுப்பங்கரையில் இருந்த மண்எண்ணையை எடுத்து தலையில் ஊற்றி தற்கொலை செய்யப்போவதாக மிரட்டினார். இதனைக் கண்ட கணவர் அய்யனார், குடிபோதையில் தானும், தற்கொலை செய்து கொள்வதாக மனைவியிடம் இருந்த கேனை பிடுங்கி தனது தலையில் ஊற்றி தீ வைத்துக் கொண்டார். பதறிப்போன கிருஷ்ணம்மாள் கணவனை காப்பாற்ற அவர் மீது பாய்ந்தார். இருவருக்கும் பலத்த தீக்காயம் ஏற்பட்டது. இருவரின் அலறல் சத்தம் கேட்டு அக்கம் பக்கத்தினர் ஓடி வந்து இருவரையும் மீட்டு கீழ்ப்பாக்கம் அரசு ஆஸ்பத்திரியில் சிகிச்சைக்காக சேர்த்தனர். அங்கு சிகிச்சை பலனின்றி இருவரும் நேற்று காலையில் பரிதாபமாக இறந்து போனார்கள். இந்த சம்பவம் தொடர்பாக பீர்க்கங்கரணை போலீசார் வழக்குப்பதிவு செய்து விசாரணை நடத்தி வருகின்றனர். கணவன், மனைவி இருவரும்  தீக்குளித்து தற்கொலை செய்து கொண்டது பீர்க்கன்கரணை பகுதியில் சோகத்தை ஏற்படுத்தியது,