வைகையில் 50 நாட்களுக்கு மட்டுமே குடிநீர் கையிருப்பு: வறட்சியை சமாளிக்குமா மாநகராட்சி?

18-07-2019 03:18 PM

மதுரை,

வைகை அணையில் இன்னும் 50 நாட்களுக்கு மட்டுமே தண்ணீர் கையிருப்பு உள்ளது. வறட்சியைச் சமாளிக்க மதுரை மாநகராட்சி தயாராகி வருகிறது.

தமிழ்நாட்டில் கடந்த 2 ஆண்டுகளாகப் பருவமழை ஏமாற்றுவதால் நடப்பாண்டு கடுமையான வறட்சி ஏற்பட்டுள்ளது.

கோவையைத் தவிர மற்ற மாநகராட்சிகள் பொது மக்களுக்கு குடிநீர் விநியோகம் செய்ய முடியாமல் பெரும் நெருக்கடியில் தவிக்கின்றன.

வைகை அணையின் நீர்மட்டம் 27.79 அடி மட்டுமே உள்ளதால் மதுரை மாநகராட்சியும் வறட்சிக்கு இலக்காகி உள்ளது.

தென் மேற்குப் பருவமழை சரியாகப் பெய்யாததால் பெரியாறு அணைக்கு நீர்வரத்து இல்லை. இதனால், வைகை அணைக்கு வெறும் 45 கன அடி தண்ணீர் மட்டுமே வருகிறது.

மதுரை நகரின் குடிநீர் பற்றாக்குறையைச் சமாளிக்க மாநகராட்சி நேற்று முதல் (ஜூலை 17) 4 நாட்களுக்கு ஒரு முறை குடிநீர் விநியோகிக்கத் தொடங்கியுள்ளது.

வைகை அணையில் இன்னும் 50 நாட்களுக்கு மட்டுமே தண்ணீர் கையிருப்பு உள்ளதால் மதுரை மாநகராட்சி நிர்வாகம் நெருக்கடியில் உள்ளது.

இதுகுறித்து மதுரை மாநகராட்சி ஆணையர் விசாகன் கூறியதாவது:

மாநகராட்சிக்கு தற்போது 170 எம்எல்டி குடிநீர் தேவைப்படுகிறது. ஆனால், வைகை குடிநீர் திட்டத்தில் இருந்து 81 எம்எல்டி குடிநீரும், காவிரி கூட்டுக் குடிநீர் திட்டத்தில் இருந்து 11 எம்எல்டி குடிநீரும், மற்ற நீர் ஆதார அமைப்புகளில் இருந்து 5.41 எம்எல்டி குடிநீரும் கிடைக்கிறது.

பெரியாறு அணைக்கு நீர் வரத்து இல்லாததால் 4 நாட்களுக்கு ஒரு முறை குடிநீர் விநியோகம் செய்யும் நிலைக்குத் தள்ளப்பட்டோம்.

பெரியாறு அணை நீர் பிடிப்புப் பகுதிகளில் தென்மேற்குப் பருவ மழை பெய்யும் என்ற நம்பிக்கை உள்ளது. மழை பெய்யாத பட்சத்தில் குடிநீருக்கு சிக்கல் ஏற்படும். வறட்சியை சமாளிப்பது குறித்து ஆலோசித்துள்ளோம்.

தமிழக அரசு வறட்சி நிவாரண நிதியாக ரூ.11.45 கோடியை மதுரை மாநகராட்சிக்கு ஒதுக்கி உள்ளது.

ஏற்கெனவே, மாநகராட்சியில் குழாய்களைத் தவிர்த்து 35 லாரிகள், 25 டிராக்டரை கொண்டு தினமும் பல்வேறு பகுதிகளில் குடிநீர் விநியோகம் செய்து வருகிறோம்.

மாநகராட்சியில் மொத்தம் 1,810 ஆழ்துளைக் கிணறுகள் உள்ளன. இதில் தண்ணீர் இன்றி 250 ஆழ்துளைக் கிணறுகள் நிரந்தரமாகச் செயல்படவில்லை. 50 ஆழ்துளைக் கிணறுகள் பழுதடைந்துள்ளன.

இந்த ஆழ்துளைக் கிணறுகளைச் சீரமைக்கும் பணியைத் தொடங்கி உள்ளோம்.

இவ்வாறு மாநகராட்சி ஆணையர் விசாகன்  கூறினார்.