முதலமைச்சர் மாநில இளைஞர் விருது: விண்ணப்பிக்க கலெக்டர் அழைப்பு

19-06-2019 03:07 AM

நாகர்கோவில்:

2019 ம் ஆண்டிற்கான முதலமைச்சர் மாநில இளைஞர் விருதுக்கு தகுதியானவர்கள் விண்ணப்பிக்க தெரிவிக்கப்பட்டுள்ளது. 

 தமிழக முதல்வர்  2014–-15 ம் ஆண்டு சட்டப்பேரவையில் விதி எண். 110 ன் கீழ்  வெளியிட்ட அறிவிப்பைத் தொடர்ந்து, சமுதாய வளர்ச்சிக்கு சேவையாற்றும் இளைஞர்களது பணியை அங்கீகரிக்கும் பொருட்டு, 2015 ம் ஆண்டு முதல் முதலமைச்சர் மாநில இளைஞர் விருது" ஒவ்வொரு ஆண்டும் சுதந்திர தினத்தன்று 15 முதல் 35 வயது வரை உள்ள 3 ஆண்கள் மற்றும் 3 பெண்களுக்கு வழங்கப்பட்டு வருகிறது. இந்த விருது ரூ. 50,000 -ரொக்கம், பாராட்டுப் பத்திரம் மற்றும் பதக்கம் ஆகியவற்றை  உள்ளடக்கியதாகும். 2019 ம் ஆண்டிற்கான முதலமைச்சர் மாநில இளைஞர் விருது வரும்  சுதந்திர தின விழாவில் தமிழக முதல்வரால்  வழங்கப்பட உள்ளது.

 தேவையான தகுதிகள்

15 வயது முதல் 35 வயது வரை உள்ள ஆண் மற்றும் பெண் ஆகியோர் விண்ணப்பிக்கலாம். கடந்த 2018 ம் ஆண்டு  ஏப்ரல் 1 ம் தேதி அன்று 15 வயது நிரம்பியவராக இருத்தல் வேண்டும் 2019  மார்ச் மாதம்  31 ம் தேதி  அன்று 35 வயதுக்குள்ளாக இருத்தல் வேண்டும். கடந்த நிதியாண்டில் (2018–-19) மேற்கொள்ளப்பட்ட சேவைகள் மட்டுமே பரிசீலிக்கப்படும். விருதிற்கு விண்ணப்பிக்கும் முன்பு குறைந்த பட்சம் 5 வருடங்கள் தமிழகத்தில் குடியிருந்தவராக இருத்தல் வேண்டும். சான்று இணைக்கப்பட வேண்டும். விண்ணப்பதாரர்கள் சமுதாய நலனுக்காக தன்னார்வத்துடன் தொண்டாற்றி இருக்க வேண்டும். அவ்வாறு அவர்கள் செய்த தொண்டு, கண்டறியப்படக் கூடியதாகவும், அளவிடக் கூடியதாகவும் இருத்தல் வேண்டும். மத்திய,  மாநில அரசுகள், பொதுத்துறை நிறுவனங்கள், பல்கலைக் கழகங்கள், கல்லூரிகள்,  பள்ளிகளில் பணியாற்றுபவர்கள் விருதிற்கு விண்ணப்பிக்க இயலாது. விண்ணப்பதாரருக்கு உள்ளுர் மக்களிடம் உள்ள செல்வாக்கு விருதிற்கான பரிசீலனையில் கணக்கிற் கொள்ளப்படும்.

விண்ணப்பிக்கும் முறை

விண்ணப்பத்தினை தமிழ்நாடு விளையாட்டு மேம்பாட்டு ஆணையத்தின் இணைய தளமான றறற.ளனயவ.வெ.பழஎ.ைெ மட்டுமே விண்ணப்பிக்க வேண்டும். இணைய தளம் மூலம் விண்ணப்ப வெளியீடு நாள்  கடந்த 16 ம் தேதி ஆகும். இணைய தளம் மூலம் விண்ணப்பிக்க கடைசி நாள் வரும் ஜூலை மாதம் 2 ம் தேதி  மாலை 5 மணி என கலெக்டர் பிரசாந்த்  வடநேரே தெரிவித்துள்ளார்.

---------------------------------------------------------------------------------------------------------------------------------